Պաշտոնական էլ. փոստ
(միայն www.e-citizen.am համակարգով ծանուցումների համար)
Նորություններ
Քաղաքացիների հետ՝ անմիջական կապի մեջ 08.07.2026
Հուլիսի 8-ին Գեղարքունիքի մարզպետ Կարեն Սարգսյանն անցկացրեց քաղաքացիների հերթական ընդունելությունը։ Մարզպետը լսեց բնակարանային, աշխատանքի, սոցիալական աջակցության, կրթության, տրանսպորտի և այլ ոլորտներին վերաբերող հարցերը։ Յուրաքանչյուր դիմում կարևոր է, և ներկայացված խնդիրները ստանում են համապատասխան ուսումնասիրություն ու ընթացք։ Շարունակում ենք բաց և անմիջական երկխոսությունը քաղաքացիների հետ՝ միասին լուծումներ գտնելու և բարձրացված հարցերին հնարավորինս արդյունավետ արձագանքելու նպատակով։
Գեղարքունիքի մարզպետը շնորհավորեց օլիմպիադայում հաջողություններ գրանցած դպրոցականներին 08.07.2026
Հուլիսի 8-ին Գեղարքունիքի մարզպետ Կարեն Սարգսյանն ընդունեց 2025-2026 ուսումնական տարվա հանրապետական առարկայական օլիմպիադայում հաջողություններ գրանցած Գեղարքունիքի մարզի աշակերտներին և նրանց դպրոցների տնօրեններին։ Մարզպետը շնորհավորեցի աշակերտներին՝ կարևոր ձեռքբերման կապակցությամբ և ընդգծեց, որ յուրաքանչյուր հաջողության հիմքում գիտելիքի նկատմամբ սերն է, հետևողական աշխատանքն ու ուսուցիչների նվիրվածությունը։ Կարեն Սարգսյանը վստահություն հայտնեց, որ մեր երիտասարդները իրենց գիտելիքներն ու կարողությունները հետագայում ծառայեցնելու են Հայաստանի Հանրապետության զարգացմանն ու հանրային բարօրությանը։ 2025-2026 ուսումնական տարվա հանրապետական առարկայական օլիմպիադայում Գեղարքունիքի մարզի դպրոցականներն արժանացել են 13 դիպլոմի և 16 գովասանագրի։ Մարզպետն անձամբ հանձնեց աշակերտներին դիպլոմներն ու գովասանագրերը՝ մաղթելով նոր հաջողություններ, ստեղծագործ միտք և նոր հաղթանակներ։․․․
ՀՀ Գեղարքունիքի մարզի և Ֆրանսիայի Իզերի դեպարտամենտի միջև ապակենտրոնացված համագործակցության շրջանակներում մարզպետ Կարեն Սարգսյանն ընդունեց «Բժշկական օգնություն և զարգացում» (AMD) ծրագրի պատասխանատու Ժան-Կլոդ Ռոսեին և ինժեներ Բրունո Ռեյնֆելդին։ Հանդիպման ընթացքում քննարկվեցին համագործակցության շրջանակներում իրականացվող ծրագրերի ընթացքը։ Անդրադարձ կատարվեց «Վ. Գետաշենի ԲԱ» և «Երանոսի ԲԱ» ՊՈԱԿ-ներում արդեն իրականացված կապիտալ վերանորոգման աշխատանքներին, ինչպես նաև «Դդմաշենի ԲԱ» ՊՈԱԿ-ի շենքի նախատեսվող կապիտալ վերանորոգման ծրագրին՝ քննարկելով դրա իրականացման հետ կապված առկա հարցերն ու հնարավոր լուծումները։ Գեղարքունիքի մարզի և Իզերի դեպարտամենտի միջև ձևավորված համագործակցությունը շարունակում է արդյունավետորեն նպաստել առողջապահական ենթակառուցվածքների զարգացմանը։ Մարզպետը վստահություն է հայտնել, որ համատեղ հետևողական աշխատանքի շնորհիվ կյանքի կկոչվեն նաև առաջիկա ծրագրերը՝ ի շահ մարզի բնակիչների։
Գեղարքունիքի մարզպետ Կարեն Սարգսյանը Մարտունիում դիտարկել է ճանապարհաշինական աշխատանքների ընթացքը 06.07.2026
Գեղարքունիքի մարզպետ Կարեն Սարգսյանը Մարտունի համայնքի ղեկավար Հովհաննես Հովեյանի հետ այցելել է Մարտունի քաղաքի Դավիթ Անհաղթ, Հրաչյա Ներսիսյան և Նարեկացի փողոցներ՝ տեղում հետևելու հիմնանորոգման աշխատանքների ընթացքին։ ՀՀ կառավարության 2025 թվականի սուբվենցիոն ծրագրերի շրջանակում այստեղ իրականացվում են շուրջ 200 միլիոն դրամի ընդհանուր արժեքով ճանապարհաշինական, մայթերի կառուցման և բարեկարգման աշխատանքներ։ Դավիթ Անհաղթ և Նարեկացի փողոցներում շինարարությունն արդեն ավարտական փուլում է, իսկ Հրաչյա Ներսիսյան փողոցում շարունակվում են ասֆալտապատման և մայթերի կառուցման աշխատանքները։ Հիմնանորոգման աշխատանքները շարունակվում են նաև Չարենցի, Ալաշկերտի և Մխիթար Հերացու փողոցներում։ Մարտունին օրեցօր ավելի բարեկարգ և հարմարավետ քաղաք է դառնում։
ՀՀ Գեղարքունիքի մարզպետ Կարեն Սարգսյանի ուղերձը Սահմանադրության օրվա առթիվ. 05.07.2026
Սիրելի՛ հայրենակիցներ, շնորհավորում եմ բոլորիս Սահմանադրության օրվա առթիվ։ Սահմանադրությունը մեր պետականության հիմնասյուներից է, որը միավորում է հասարակությանը ընդհանուր արժեքների շուրջ և սահմանում երկրի զարգացման ու իրավական պետության ամրապնդման ուղենիշները։ Մեզանից յուրաքանչյուրի պատասխանատվությունն է հարգել օրենքը, պահպանել սահմանադրական արժեքները և իր ներդրումն ունենալ ավելի ուժեղ ու կայուն Հայաստանի կերտման գործում։ Մաղթում եմ, որ մեր երկրում միշտ գերակայի խաղաղությունը, օրինականությունն ու համերաշխությունը։ Շնորհավո՛ր Սահմանադրության օրը։ Փա՛ռք մեր հերոսներին և կեցցե՛ Հայաստանի Հանրապետությունը։
Գեղարքունիքի մարզպետ Կարեն Սարգսյանն աշխատանքային այցով եղել է Ծովինար բնակավայրում 03.07.2026
Գեղարքունիքի մարզպետ Կարեն Սարգսյանը այցելել է Ծովինար բնակավայր, որտեղ մեկնարկել են /Մ-10/–Ծովինար–/Մ-10/ մարզային նշանակության ճանապարհի 2,4 կիլոմետրանոց հատվածի միջին նորոգման աշխատանքները։ ՀՀ պետական բյուջեի միջոցներով՝ Գեղարքունիքի մարզպետի աշխատակազմի պատվիրատվությամբ իրականացվող ծրագրի ընդհանուր արժեքը կազմում է 116 միլիոն 400 հազար դրամ։ Նախատեսվում է իրականացնել ճանապարհի ծածկի փոսային նորոգում, առանձին հատվածներում՝ հարթեցնող շերտի տեղադրում, ինչպես նաև 13 783 քառակուսի մետր մակերեսով ասֆալտբետոնե վերին ծածկի տեղադրում։ Ճանապարհի կողնակներում կտեղադրվի ավազակոպճային շերտ, իսկ աշխատանքների ավարտին կտեղադրվեն ճանապարհային նշաններ և կիրականացվի գծանշում։
