Պաշտոնական էլ. փոստ
(միայն www.e-citizen.am համակարգով ծանուցումների համար)
Նորություններ
Այսօր Գեղարքունիքի մարզպետ Կարեն Սարգսյանն ընդունեց գերմանական «GIZ» կազմակերպության հայաստանյան գրասենյակի ղեկավար Սոնյա Կուրցին, գերմանական «BMZ» կազմակերպության ներկայացուցիչ Կատրին Բուդեր-Պելցին, ԵՄ պատվիրակության ներկայացուցիչ Սուսանա Մարտինսին, կազմակերպությունների այլ պատասխանատուների։ Հանդիպման ընթացքում կողմերը քննարկեցին Գերմանիայի կառավարության և Եվրոպական միության ֆինանսական աջակցությամբ Գերմանական միջազգային համագործակցության ընկերության (GIZ) միջոցով Սևանա լճի էկոհամակարգերի բարելավման և կայուն զարգացման նպատակով մարզի որոշ բնակավայրերում և նախակրթական հաստատություններում կեղտաջրերի մաքրման կայանների ստեղծման, դրանց կառուցման նպատակով համապատասխան նշանակության հողատարածքների հասանելիության ապահովմանը վերաբերող հարցեր, ծրագրի հետ կապված այլ մանրամասներ։ Մարզպետ Կարեն Սարգսյանը բարձր գնահատեց «GIZ» կազմակերպության կողմից վերջին տարիների ընթացքում Գեղարքունիքի մարզի տարբեր բնակավայրերում իրականացված ծրագրերի նշանակությունը և նշեց, որ շարունակելու է համագործակցված քայլեր կատարել՝ ի նպաստ Սևանա լճի կենսաբազմազանության պահպանմանն ու վերականգնմանն ուղղված ծրագրերի իրականացման։
ՀՀ վարչապետի հովանու ներքո անցկացվեց «Սևանի շուրջը» սիրողական հեծանվային արշավ 30.08.2026
ՀՀ վարչապետի հովանու ներքո անցկացվող «Սևանի շուրջը» սիրողական հեծանվային արշավի առաջին օրն ամփոփվել է խարույկի շուրջ հանդիպմամբ: Այսօր մասնակիցները շարունակել են հեծանվարշավը. նախատեսված երթուղին բաղկացած է երեք հատվածից՝ 24 կմ, 26,1 կմ և 28,7 կմ։ Այսպիսով, երկրորդ օրը մասնակիցները կանցնեն շուրջ 79 կմ՝ հասնելով վերջնագծին Սևանի թերակղզում։ Առավոտյան մասնակիցների հետ հանդիպել է նաև ՀՀ կրթության, գիտության, մշակույթի և սպորտի նախարար Ժաննա Անդրեասյանը: Հեծանվարշավին մասնակցուն է նաև ՀՀ վարչապետ Նիկոլ Փաշինյանը: Երկու օրերի ընթացքում հեծանվորդները, ըստ նախնական երթուղու, կանցնեն շուրջ 215 կմ ճանապարհահատված՝ Սևանի շուրջը։ Արշավի բոլոր մասնակիցներին կտրվեն մասնակցության հավաստագրեր։ Միջոցառումը մրցանակային հիմնադրամ չի նախատեսում։ Երկօրյա նախաձեռնության նպատակն է նպաստել Հայաստանում հեծանվային արշավների ավանդույթի ձևավորմանն ու զարգացմանը, խթանել հեծանվային մշակույթը և առողջ ապրելակերպը։
«Ֆեստիվառ» երաժշտական-զբոսաշրջային փառատոնը Ճամբարակում 29.08.2026
«Ֆեստիվառ» երաժշտական-զբոսաշրջային փառատոնի այս տարվա վերջին կանգառը Ճամբարակում է։ Նախքան ամփոփիչ համերգը ՀՀ ԿԳՄՍ նախարար Ժաննա Անդրեասյանը, Գեղարքունիքի մարզպետ Կարեն Սարգսյանը և Հանրային հեռուստաընկերության գործադիր տնօրեն Հովհաննես Մովսիսյանը Ճամբարակում ծանոթացել են տեղական արտադրանքի տոնավաճառին՝ շրջելով տաղավարներով: Փառատոնի հյուրերն ու մասնակիցները հնարավորություն են ունեցել օգտվելու նաև անվճար երթուղիներից և բացահայտելու Գեղարքունիքի մարզի տեսարժան վայրերը: Այսօր ֆեստիվառյան բեմում են լինելու «Եվրատեսիլ» երգի մրցույթում տարբեր տարիներին Հայաստանը ներկայացրած արտիստները։ «Ֆեստիվառ» երաժշտական-զբոսաշրջային փառատոնն իրականացվում է ՀՀ ԿԳՄՍ նախարարության աջակցությամբ։
«Ֆեստիվառ» երաժշտական-զբոսաշրջային փառատոն 29.08.2026
Ճամբարակում կայացավ «Ֆեստիվառ» երաժշտական-զբոսաշրջային փառատոնի այս տարվա վերջին համերգը: Բեմում էին «Եվրատեսիլ» երգի մրցույթում տարբեր տարիներին Հայաստանը ներկայացրած արտիստները։ «Ֆեստիվառն» իրականացվում է ՀՀ ԿԳՄՍ նախարարության աջակցությամբ։
Մեկնարկել է ՀՀ վարչապետի հովանու ներքո անցկացվող «Սևանի շուրջը» սիրողական հեծանվային արշավը 29.08.2026
Երկօրյա հեծանվարշավին մասնակցության հայտ է ներկայացրել 106 քաղաքացի, սակայն նախապատրաստական մարզումներից հետո հաստատվել է նրանցից 86-ի մասնակցությունը: Օգոստոսի 29-ին հեծանվային արշավի մեկնարկը տրվել է առավոտյան ժամը 07:30-ին։ Հեծանվարշավին մասնակցում է նաև ՀՀ վարչապետ Նիկոլ Փաշինյանը։ Առավոտյան մասնակիցների հետ հանդիպել և նրանց հաջողություն են մաղթել ՀՀ կրթության, գիտության, մշակույթի և սպորտի նախարար Ժաննա Անդրեասյանը և Գեղարքունիքի մարզպետ Կարեն Սարգսյանը։ Մասնակիցները Սևանա լճի շուրջ նախատեսված երթուղին անցնում են սեփական՝ մեխանիկական հեծանիվներով։ Առաջին օրվա երթուղին շուրջ 136 կմ է․ այն բաժանված է չորս հատվածի՝ մեկնարկից մինչև առաջին կանգառ՝ 35 կմ, առաջինից երկրորդ կանգառ՝ 33 կմ, երկրորդից երրորդ կանգառ՝ 35,4 կմ, իսկ երրորդ կանգառից մինչև գիշերակացի վայր՝ ևս 33 կմ։ Երեկոյան նախատեսված է նաև մասնակիցների հանդիպումը խարույկի շուրջ։ Հեծանվային արշավը կշարունակվի նաև օգոստոսի 30-ին։ Նախատեսված երթուղին բաղկացած է երեք հատվածից՝ 24 կմ, 26,1 կմ և 28,7 կմ։ Այսպիսով, երկրորդ օրը մասնակիցները կանցնեն շուրջ 79 կմ՝ հասնելով վերջնագծին Սևանի թերակղզում։
Սոթքում՝ ջրի նոր համակարգ դեպի նոր հնարավորություններ 27.08.2026
Սոթքում Գեղարքունիքի մարզպետ Կարեն Սարգայանը մասնակցեց նոր ոռոգման համակարգի բացման արարողությանը։ Միջոցառմանը ներկա էին նաև ՄԱԿ-ի ՊՀԾ Հայաստանյան գրասենյակի ղեկավար Լեյլա Մելիուն, ՀՀ ՏԿԵՆ, ՏԿԵՆ ՋԿ և ՀՀ ԱԳՆ ներկայացուցիչներ, Վարդենիս համայնքի ղեկավար Ահարոն Խաչատրյանը, համայնքի բնակիչներ և հյուրեր։ ՄԱԿ-ի Պարենի համաշխարհային ծրագրի, «Հայկը մեր հերոսների համար» ամերիկյան հասարակական կազմակերպության և Վարդենիս համայնքի եռակողմ աջակցությամբ կառուցվել է 6․2 կմ երկարությամբ ոռոգման ջրագիծ և 4400 խմ ծավալով ջրավազան։ Արդյունքում շուրջ 160 հեկտար ցանքատարածություն կապահովվի անխափան ոռոգմամբ՝ նպաստելով Սոթքի տնտեսությունների զարգացմանն ու բերքատվության բարձրացմանը։ Ջուրը գյուղատնտեսության հիմքն է, իսկ նման ծրագրերը՝ համայնքների կայուն զարգացման կարևոր գրավականը։ Առաջիկայում նմանատիպ ծրագիր կիրականացվի նաև Գեղամասարում։
