Պաշտոնական էլ. փոստ
(միայն www.e-citizen.am համակարգով ծանուցումների համար)
Նորություններ
Անցկացվել է ցուցադրական հատուկ տակտիկական ուսումնավարժություն 18.06.2026
Սևանա լճի «Նոյ Լենդ» հանգստյան գոտու հարակից տարածքում անցկացվել է ցուցադրական հատուկ տակտիկական ուսումնավարժություն՝ «Հրդեհաշիջման աշխատանքների կազմակերպումը և իրականացումը զբոսանավում առաջացած հրդեհի դեպքում» թեմայով։ Ըստ ուսումնավարժության սցենարի՝ զբոսանավում բռնկված հրդեհի հետևանքով եղել են տուժածներ, ինչպես նաև քաղաքացիներ, որոնք խուճապի հետևանքով հայտնվել են ջրում։ Ստեղծված պայմաններում իրականացվել են հրդեհաշիջման, ջրափրկարարական, որոնողափրկարարական և տուժածների տարհանման աշխատանքներ։ Ուսումնավարժությանը մասնակցել են ՀՀ ՆԳՆ ՓԾ Գեղարքունիքի մարզային փրկարարական վարչության և ենթակա ստորաբաժանումների, ՆԳՆ ոստիկանության ջրային պարեկային ծառայության, ինչպես նաև Գավառի և Սևանի բժշկական կենտրոնների աղետների բժշկության մեկական թիմեր։ Վարժանքի նպատակն էր կատարելագործել անձնակազմի գործնական հմտությունները, բարձրացնել տարբեր ծառայությունների միջև փոխգործակցության արդյունավետությունը և ստուգել արտակարգ իրավիճակներում արագ ու համակարգված արձագանքման պատրաստվածությունը։
ՀՀ կառավարության հերթական նիստում 18.06.2026
ՀՀ կառավարության 2026 թվականի հունիսի 18-ի հերթական նիստում որոշում է կայացվել Գեղարքունիքի մարզին հատկացնել 64 միլիոն 265.0 հազար դրամ՝ երեք բնակավայրերի ենթակառուցվածքների զարգացմանն ուղղված սուբվենցիոն ծրագրերը համաֆինանսավորելու նպատակով։ Այդ թվում․ 5 միլիոն 888.8 հազար դրամ՝ Մարտունի համայնքի Լիճք բնակավայրի մշակույթի տան վերանորոգման համար։ 58 միլիոն 376.2 հազր դրամ՝ Մարտունի համայնքի Ծովինար և Զոլաքար բնակավայրերում ոռոգման ջրատարների կառուցման համար։
ՀՀ կառավարությունը կսուբսիդավորի կաթի արժեքը 18.06.2026
Հունիսի 18-ին ՀՀ Էկոնոմիկայի նախարարի տեղակալ Տաթևիկ Սարգսյանը Գեղարքունիքի մարզպետի աշխատակազմում հանդիպեց մարզի գյուղատնտեսության և անասնապահության ոլորտի ներկայացուցիչների հետ։ Հանդիպմանը ներկա էին էկոնոմիկայի նախարարության, Գեղարքունիքի մարզպետի աշխատակազմի, համայնքապետարանների պատասխանատու ստորաբաժանումների ղեկավարներ, մարզի անասնաբուծության ոլորտի ներկայացուցիչներ։ Հանդիպումը վարեց Գեղարքունիքի մարզպետի տեղակալ Վահան Զարոյանը։ Նախարարի տեղակալը խոսեց ՀՀ կառավարության կողմից հաստատված գյուղատնտեսության ոլորտի պետական աջակցության ծրագրերի մասին, մասնավորապես անդրադառնալով անասնապահության, կաթի արտադրության սուբսիդավորման միջոցառման իրականացմանը։ Ինչպես ներկայացվեց, ֆերմերային կամ գյուղացիական տնտեսություններում կենդանիների գլխաքանակը ավելացնելու նպատակով, կառավարությունը ամեն գլուխ կովի համար նախատեսել է տրամադրել 15.000-ական դրամ ։ Սուբսիդավորումը տրամադրվում է շահառուի կողմից տնօրինվող միայն 3-րդ գլխից սկսած մինչև 22 գլուխը ներառյալ կովերի համար (առավելագույնը 20 գլուխ)։․․․
Գավառի բկ-ում կայացել է Ավետիք Բուռնազյանի անվան հուշատախտակի բացման արարողությունը 17.06.2026
Գեղարքունիքի մարզպետի տեղակալ Ջանիկ Բազեյանը Գավառ համայնքի ղեկավար Գուրգեն Մարտիրոսյանի հետ միասին Գավառի բժշկական կենտրոնում մասնակցել են ծնունդով Նոր Բայազետցի, բժիշկ, ռազմական և քաղաքացիական առողջապահության կազմակերպիչ ԽՍՀՄ առողջապահության նախարարի տեղակալ (1956—1981), բժշկական գիտությունների թեկնածու (1938), բժշկական ծառայության գեներալ-լեյտենանտ (1945), սոցիալիստական աշխատանքի հերոս, Լենինյան և ԽՍՀՄ պետական մրցանակների դափնեկիր Ավետիք Իգնատի Բուռնազյանի հուշատախտակի բացման հանդիսավոր արարողությանը։ Նախաձեռնությունը կյանքի է կոչվել Գեղարքունիքի՝ Վարդգես Պետրոսյանի անվան մարզային գրադարանի և Գավառի բժշկական կետրոնի համատեղ ջանքերով։ Բացման արարողությունն ուղեկցվել է Գավառի տարածաշրջանի հոգևոր հովիվ Տեր Նշան քահանա Սարգսյանի օրհնության խոսքով, հուշատախտակի բացումը կատարել են Գավառի բժշկական կենտրոնի տնօրեն Գարիկ Սողոմոնյանն ու Ավետիք Բուռնազյանի ազգակից Վարդան Բուռնազյանը։ Բացման արարողությանը ներկա են եղել նաև...
ՆԳՆ շրջիկ սպասարկման գրասենյակը ծառայություն կմատուցի Գեղարքունիքի մարզի Վարդենիս համայնքում 17.06.2026
ՆԳՆ սպասարկման գրասենյակը շարունակում են իրականացնել շրջիկ սպասարկում՝ քաղաքացիներին մատուցելով և՛ միգրացիայի և քաղաքացիության ծառայության, և՛ հաշվառման-քննական բաժինների ծառայություններ։ ՆԳ նախարարի հրամանի համաձայն՝ հունիսի 18-ին ժամը 10։00-16:00 ծառայություն կմատուցվի Գեղարքունիքի մարզի Վարդենիս համայնքում՝ համայնքապետարանի հարևանությամբ։ Շրջիկ սպասարկման շրջանակում քաղաքացիները կարող են փոխանակել անձնագիրը, ստանալ ժամանակավոր պաշտպանության վկայական, տեղեկանքներ։ Վարորդական իրավունքի ու սեփականության վկայականների, հաշվառման վկայագրի փոխանակման կամ կորստի դեպքում քաղաքացիները մոտենալով շրջիկ գրասենյակ` կարող են նորը ստանալ, օգտվել նաև հաշվառման-քննական բաժինների կողմից մատուցվող այլ ծառայություններից։
Զարգացման օրակարգը՝ մշտական ուշադրության կենտրոնում 15.06.2026
Կայացավ աշխատանքային հերթական խորհրդակցությունը մարզպետի աշխատակազմի ստորաբաժանումների ղեկավարների մասնակցությամբ։ Քննարկվեցին մարզի զարգացմանն առնչվող մի շարք կարևոր հարցեր՝ ենթակառուցվածքային ծրագրերից և կրթությունից մինչև առողջապահություն, գյուղատնտեսություն և համայնքային զարգացում։ Ամփոփվեցին կատարված աշխատանքները, նախանշվեցին առաջիկա անելիքները և տրվեցին համապատասխան հանձնարարականներ։ Ամենօրյա հետևողական աշխատանքով շարունակում ենք ձևավորել ավելի զարգացած և հարմարավետ Գեղարքունիք։
