Պաշտոնական էլ. փոստ
(միայն www.e-citizen.am համակարգով ծանուցումների համար)
Նորություններ
Սեպտեմբերի 25-ին Լիճք համայնքում բացվեց համայնքից Արցախյան վերջին պատերազմում զոհված հերոսներ Արտյոմ Վաղինակի Ավետիսյանի, Սարգիս Հովիկի Սրքոյանի, Վելգեմ Արագոնի Գեղամյանի եւ Սաշա Աշոտի Կարապետյանի հիշատակը հավերժացնող հուշարձանը: Այն կառուցվել էր հերոս զինծառայողների ծնողների անմիջական նախաձեռնությամբ և ֆինանսական ներդրումների հաշվին: Հուշարձանը տեղադրվել է համայնքի մուտքի մոտ, Հայրենական Մեծ պատերազմի եւ Հայոց ցեղասպանության սրբադասված նահատակների հուշարձանների կողքին՝ Վաչագան Հարությունյանի քանդակագործությամբ: Հուշարձանի բացման արարողությանը մասնակցեցին Գեղարքունիքի մարզպետ Կարեն Սարգսյանը, Գեղարքունիքի մարզպետի տեղակալ Ռուբիկ Նավոյանը,Գեղարքունյաց թեմի առաջնորդական տեղապահ Պարթեւ վարդապետ Բարսեղյանը, Լիճք համայնքի ղեկավար Գնել Գրիգորյանը, համայնքի մանկավարժներ, դպրոցականներ, Արցախյան վերջին պատերազմում զոհված զինծառայողների ծնողներ և հարազատներ: Արարողության մեկնարկին ներկաները մեկ րոպե լռությամբ...
Վարժանքների անցկացում 24.09.2021
Ս/թ սեպտեմբերի 27-ին Գեղարքունիքի ՄՓՎ-ն անցկացնելու է «Ազդարարում, տարահանում, պատսպարում» թեմայով վարժանքներ, քննարկումներ՝ ՀՀ Գեղարքունիքի մարզի Այրք, Վերին Շորժա և Ներքին Շորժա բնակավայրերում։ Նշված համայնքների բնակիչներին խնդրվում է խուճապի չմատնվել:
Գեղարքունիքի մարզպետ Կարեն Սարգսյանը հանդիպում ունեցավ մարզի բուժհիմնարկների տնօրենների հետ 23.09.2021
Սեպտեմբերի 23-ին Գեղարքունիքի մարզպետ Կարեն Սարգսյանը հանդիպում ունեցավ մարզի բուժհիմնարկների տնօրենների հետ: Հանդիպմանը մասնակցում էր նաև Գեղարքունիքի մարզպետի տեղակալ Ռուբիկ Նավոյանը, ոլորտի պատասխանատու այլ աշխատակիցներ: Հանդիպման սկզբում մարզպետը ողջունեց բուժհիմնարկների տնօրեններին, շնորհավորեց նրանց ՀՀ Անկախության 30-ամյակի առթիվ և շնորհակալություն հայտնեց 2020 թվականի Արցախյան պատերազմի ընթացքում կատարած թիկունքային աշխատանքների, ինչպես նաև Covid-19-ի դեմ պայքարի շրջանակներում իրականացվող միջոցառումներին համար: Մարզպետը մարզի բուժհիմնարկների տնօրեններին հորդորեց՝ տեղերում ցուցաբերել ամենայն պատասխանատվություն, համագործակցված աշխատանք իրականացնել մարզպետարանի հետ, որպեսզի ոլորտին վերաբերող բոլոր տեսակի խնդիրները ժամանակին և սահմանված կարգով լուծում ստանան: Հանդիպման ընթացքում Գեղարքունիքի մարզպետարանի առողջապահության և սոցիալական ապահովության վարչության պետը ներկայացրեց մարզում համավարակի դեմ պայքարին ուղղված միջոցառումների պատկերը:
Վարդենիս համայնքում հանդիսավոր պայմաններում նշվեց ՀՀ Անկախության 30 ամյակը 22.09.2021
Սեպտեմբերի 21-ին Հայաստանի Հանրապետության Անկախության 30-ամյակի առթիվ Վարդենիս քաղաքում կազմակերպվեց միջոցառում, որին մասնակցում էին Գեղարքունիքի մարզպետ Կարեն Սարգսյանը, մարզպետի տեղակալ Ռուբիկ Նավոյանը, զինվորականներ, հյուրեր, վարդենիսցիներ: Տոնական միրոցառման մեկնարկը տրվեց Վարդենիսի Սուրբ Աստվածածին եկեղեցուց, որտեղ Գեղարքունյաց թեմի Մարտունու տարածաշրջանի հոգևոր տեսուչ տեր Գևորգ քահանա Բարսեղյանի ձեռամբ մատուցվեց պահպանիչ աղոթքի արարողություն: Այնուհետև Գեղարքունիքի մարզպետ Կարեն Սարգսյանը և միջոցառման մասնակիցները Մոնթե Մելքոնյանի անվան այգում ծաղկեպսակներ դրեցին և ծաղիկներ խոնարհեցին: Անկախության օրվան նվիրված միջոցառումը շարունակվեց Վարդենիսի մշակույթի պալատի բակում, որտեղ հնչեցին մեծարման, շնորհավորանքի և ոգեկոչման խոսքեր` ուղղված հայրենյաց պաշտպաններին և նրանց փառավոր հիշատակին։ Ելույթ ունեցողները հույս հայտնեցին, որ հայ ազգը միշտ էլ կանգնած է եղել խաղաղ ու հզոր պետականություն կերտելու ճանապարհին և մշտապես պայքարել է` այն ամուր պահելու համար: «Հարյուրամյակների հեռվից իրականություն դարձավ հայ ժողովրդի նվիրական երազանքը, և մենք ունեցանք Անկախ Հայաստանի Հանրապետություն, որի 30 ամյակն այսօր մենք նշում ենք ազգովի: Այն կյանքի կոչվեց հայ ժողովրդի հայրենասիրության, միասնականության և համախմբվածության շնորհիվ:
Սեպտեմբերի 21-ին Գեղարքունիքի մարզպետ Կարեն Սարգսյանն այցելեց Ծովինար համայնք, որտեղ ԱՀ նախագահի հրամանագրով «Մարտական ծառայություն» մեդալներ հանձնեց 2020 թվականի սեպտեմբերի 27-ին հակառակորդի սանձազերծած լայնածավալ գործողությունների ընթացքում Արցախի Հանրապետության պետական սահմանը պաշտպանելիս մարտական գործողությունների ընթացքում ցուցաբերած արիության և խիզախության համար պարգևատրված Սիմոն Ավետիսի Մելքոնյանին և Արգիշտի Ալֆենդրի Օհանյանին: Կարեն Սարգսյանն իր խոսքում շնորհակալություն հայտնեց նախկին զինծառայողներին՝ 44-օրյա պատերազմի ընթացքում ցուցաբերած արիության և խիզախության համար: Մարզպետն իր երախտագիտությունը հայտնեց նաև պարգևի արժանացած զինծառայողների ծնողներին՝ նման հայրենասեր զավակ դաստիարակելու համար: Նույն համայնքում Գեղարքունիքի մարզպետն այցելեց և Ռոբերտ Սարգսի Աբրահամյանին հետմահու շնորհված Մարտական ծառայություն» մեդալը հանձնեց նրա ծնողներին: Կարեն Սարգսյանը հիշատակի և երախտագիտության խոսքեր հնչեցրեց հերոսացած Ռոբերտ Աբրահամյանի հասցեին, խոսեց նրա մարտական գործողությունների, ցուցաբերած արիության մասին, նշելով, որ նման տղաների անձնուրացության շնորհիվ է, որ այսօր մենք ունենք 30-ամյա Անկախ Հայաստանի Հանրապետություն:
Շնորհավո՛ր ծնունդդ, ազատ, անկախ 30-ամյա Հայաստանի Հանրապետություն։ Հարյուրամյակներ շարունակ ազգային պետականությունը կորցրած, քսաներորդ դարի առաջին ցեղասպանությունը՝ մարդկության հանդեպ մեծագույն հանցագործություններից մեկը վերապրած մեր ժողովրդի համար սեպտեմբերի 21-ը վերածննդի խորհուրդ ունի։ Այս օրը մեր հավատի, վստահության ու համոզմունքների խորհրդանիշն է, քանզի երկրի անկախությունը բալասան է դառնում ոչ միայն անցած վերքերը բուժելու, այլև ուրախության ու զարթոնքի, վաղվա նկատմամբ անսահման հույսեր պարգևելու առումով։ Մենք, հիրավի, ապրում ենք պատմական դարաշրջանում։ Արդի աշխարհը նորանոր մարտահրավերներ է նետում մեզ։ Համոզված եմ, որ կարող ենք դրանք հաղթահարել միասնականությամբ ու նվիրումով, այն միասնությամբ, որի ծնունդն է անկախությունը։ Օրվա առիթով հիշատակի և երախտագիտության խոսքեր պետք է ասել նրանց հասցեին, ովքեր հերոսացան ու նահատակվեցին հանուն Հայաստանի։ Այսօր կառուցելով ու զարգացնելով մեր անկախ երկիրը, պետք է կատարենք այդ հերոսների պատվիրանը՝ վառ պահելով նրանց հիշատակը։ Մաղթում եմ նորանոր ձեռքբերումներ ու նվաճումներ, ամուր կամք՝ շենացնելու ու հզորացնելու մեր հայրենիքը, կերտելու մեր երազանքների հզոր Հայաստանը։
