Պաշտոնական էլ. փոստ
(միայն www.e-citizen.am համակարգով ծանուցումների համար)
Նորություններ
Մարզպետարանի ենթակայությամբ գործող միջնակարգ դպրոցների 1202 շրջանավարտներից բուհեր են ընդունվել 377-ը, կամ շրջանավարտների ընդհանուր թվի 31,3 տոկոսը։ ՀՀ ԿԳՄՍ նախարարության ենթակայությամբ գործող ավագ դպրոցների 434 շրջանավարտներից բուհեր են ընդունվել 221-ը, կամ շրջանավարտների ընդհանուր թվի 50,9 տոկոսը։ Արդյունավետությամբ աչքի է ընկել Վարդենիսի ավագ դպրոցը, որտեղ 25 շրջանավարտներից 20-ը ընդունվել են բուհեր։ Երկրորդ ցուցանիշը պատկանում է Մարտունու ավագ դպրոցին՝ 66,6 տոկոս։ Գավառի ավագ դպրոցն ապահովել է 60,6, Ճամբարակի ավագ դպրոցը՝ 51,7, Սեւանի ավագ դպրոցը՝ 44,2, Վարդենիկի կրթահամալիրը՝ 40, Ծաղկունքի բաց դպրոցը՝ 46, Ձորագյուղի ավագ դպրոցը՝ 18,6 տոկոսանոց ցուցանիշ։ Առավել շատ թվով շրջանավարտներ՝ 156 հոգի, ընտրել են Երեւանի պետական համալսարանի տարբեր ֆակուլտետները։ 68 շրջանավարտ ընդունվել է․․․
Մարզպետ Կարեն Սարգսյանը մշտադիտարկում կատարեց Գավառ քաղաքի ճանապարհաշինական տեղամասում 15.08.2022
Կարեն Սարգսյան / Karen Sargsyan Մշտադիտարկում կատարեցի Գավառ քաղաքի ճանապարհաշինական տեղամասում Հիմնանորոգվող միջպետական նշանակության Մ-10-Գավառ ճանապարհի երկարությունը 3,4 կլիոմետր է, որն ընդգրկում է Գավառ քաղաքի Հրանտ Հակոբյան, Ազատության, Զորավար Անդրանիկ փողոցները եւ Գավառի կենտրոնական հրապարակին հարող հատվածները։ Ծրագրի պայմանագրային արժեքը կազմում է 1 միլիարդ 536 միլիոն 606 հազար դրամ։ Նախագծով նախատեսվում է կառուցել ջրահեռացման ներքին ցանց, հիմք եւ ավելի քան 60 հազար քառակուսի մետր երկշերտ ասֆալտբետոնյա ծածկ, տեղադրել բազալտե եզրաքարեր։ Օգոստոսի 12-ի դրությամբ արդեն նախկին ասֆալտբետոնյա ծածկը եւ հողի շերտը հեռացվել է շուրջ 2 կիլոմետր երկարությամբ։ Որոշ տեղերում տեղադրվել են ջրահեռացման համակարգեր, սկսվել է ասֆալտբետոնյա առաջին շերտի տեղադրումը Հրանտ Հակոբյան փողոցում՝ մոտ 500 գծամետր երկարությամբ եւ 4000 քառակուսի մետր մակերեսով:․․․
Կառավարությունը հաստատել է աշնանացան ցորենի արտադրության խթանման 2022 թվականի աջակցության ծրագիրը 15.08.2022
1 հա աշնանացան ցորենի մշակության ծախսերի, մասնավորապես սերմի, պարարտանյութի և դիզելային վառելիքի ձեռքբերման ծախսերի մասնակի փոխհատուցման միջոցով, որի շրջանակում հավաստագրված սերմերով ցանք կատարելու դեպքում 1 հա-ի համար կտրամադրվի 120000 դրամ, իսկ չհավաստագրված սերմերով ցանքի դեպքում՝ 70000 դրամ։ Ծրագրի շահառու կարող է հանդիսանալ մինչև 100 հա մակերեսով (բացառությամբ տնամերձ հողատարածքների) ցորենի ցանքատարածություններ մշակող տնտեսավարողը, ընդ որում, ծրագրի շրջանակում յուրաքանչյուր շահառուի կողմից մշակվող ցանքատարածությունների հանրագումարը չի կարող գերազանցել 100 հա-ը, իսկ միևնույն հողամասի նկատմամբ համասեփականատերերի առկայության դեպքում ծրագրից կարող է օգտվել համասեփականատերերից միայն մեկը։ Ծրագրի շրջանակում պետք է պարտադիր ցանք կատարվի մինչև 2022 թվականի նոյեմբերի 1-ը, իսկ ցածրադիր շրջաններում եղանակային պայմաններից կախված, մինչև 2022 թվականի նոյեմբերի առաջին տասնօրյակը:
#ՀՀ_կառավարության_ծրագրերը_հզոր_հայրենիքի_երաշխիք 15.08.2022
ՀՀ կառավարության կողմից 2022 թվականին իրականացվող սուբվենցիոն ծրագրերի շրջանակներում Գեղարքունիքի մարզի Աստղաձոր գյուղի թիվ 46,47,48 փողոցներում կկառուցվի խմելու ջրատարի ներքին ցանց՝ 1 կիլոմետր ընդհանուր երկարությամբ։ Ծրագրի նախնական ընդհանուր արժեքը կազմում է 18 միլիոն 897 հազար դրամ, որի 70 տոկոսը հատկացնում է ՀՀ կառավարությունը, 30 տոկոսը՝ Մարտունու համայնքապետարանը։ Ծրագրի իրականացման արդյունքում վերոնշյալ փողոցներում բնակվող շուրջ 200 տնտեսությունների համար կբարելավվի ջրամատակարարումը: Շինարարական աշխատանքների մրցույթը կհայտարարվի առաջիկայում։ Աշխատանքները կավարտվեն այս տարվա ընթացքում։
Կարեն Սարգսյան / Karen Sargsyan Ընդունեցի Միավորված ազգերի կազմակերպության «Աղետների ռիսկի նվազեցման ծրագրերի» համակարգող Արմեն Չիլինգարյանին։ Հանդիպմանը մասնակցեցին նաեւ Մարտունի համայնքի ղեկավար Հովհաննես Հովեյանը, «Գեղարքունիք» ՋՕԸ տնօրեն Արտաշ Սարդարյանը, Գեղարքունիքի մարզպետարանի ստորաբաժանումների ղեկավարներ։ Հանդիպման սկզբում Արմեն Չիլինգարյանը ներկայացրեց ՄԱԿ-ի «Աղետների ռիսկի նվազեցման ծրագրերի» բովանդակությունը եւ ուղղությունները, Գեղարքունիքի մարզում դրանց ներդրման հնարավորությունները եւ հեռանկարները։ Ծրագիրը հիմնականում ֆինանսավորվում է Ճապոնիայի կառավարության կողմից։ Այն իրականացվում է երեք հիմնական ուղղություններում՝ օդերեւութաբանական կայանների հիմնում, ջրային ավազանների քարտեզագրում եւ բարելավում, ոռոգման համակարգերի արդիականացում։ Այդ ուղղություններում ներդրվող ծրագրերը նպաստելու են հիդրոօդերեւութաբանական ճշգրիտ տվյալների ձեռքբերմանը, ջրային ավազանների եւ էկոհամակարգերի, ինչպես նաեւ ոռոգման համակարգի բարելավմանը, աղետի ռիսկերի կառավարմանը եւ Սեւանա լճից իրականացվող ջրառի նվազեցմանը։ Հնարավոր է օժանդակել նաեւ համայնքային տնկարանների ստեղծման կամ ընդլայնման ծրագրերին։ Չափազանց կարեւոր է սելավային վտանգի քարտեզագրումը Գեղարքունիքում, քանի որ մեր մարզն այս ուղղությամբ ռիսկային է։ Այս ամենը կյանքի կոչելու համար անհրաժեշտ է Գեղարքունիքի մարզպետարանի, մարզի համայնքների, Գեղարքունիքի մարզի ջրօգտագործող ընկերության եւ ծրագրի մշտական, ամենօրյա համագործակցությունը։ Թեեւ ծրագրի բոլոր ուղղությունները չափազանց կարեւոր են մարզի գյուղատնտեսության եւ շրջակա միջավայրի պահպանության, աղետների ռիսկերը կառավարելու տեսանկյունից, սակայն առաջնահերթ եմ համարում ոռոգման համակարգերի արդիականացման ուղղությունը, որտեղ ավելի հրատապ խնդիրների կարգավորման անհրաժեշտություն կա։ Մենք միատեղ համալիր ուսումնասիրություն կանցկացնենք Ճամբարակ համայնքի Գետիկի ջրամբարում, որտեղ աղետի ռիսկերի կառավարման եւ նվազեցման խնդիր կա, կուսումնասիրենք եւ կյանքի կկոչենք մյուս առաջնահերթ անելիքները։ Բայց, նկատի ունենալով Մարտունի համայնքի ղեկավարի եւ «Գեղարքունիք» ՋՕԸ տնօրենի առաջարկությունները, նպատակահարմար ենք գտնում՝ կանգ առնել Մարտունի համայնքի Ծովինար եւ Աստղաձոր գյուղերի ոռոգման ցանցերի արդիականացման ծրագրի իրականացման վրա։ Այս ծրագիրը կյանքի կոչելու դեպքում մի քանի տասնյակ հեկտարներով կավելացնենք ոռոգվող հողատեսքերը, մյուս կողմից էլ նվազագույնի կհասցնենք ջրի կորուստները։ Բացի այդ, տնտեսություններն արդեն այդ տարածքներում կկարողանան հիմնել պտղատու այգիներ, մշակել եկամտաբեր ու օգտակար այլ մշակաբույսեր։ Նաեւ որպես ծրագրի բաղադրիչ մաս ներկայացվեց պոմպակայանների արդիականացումը՝ դրանք արեւային ֆոտովոլտային կայաններով վերազինելու եւ գործարկելու հեռանկարով։ Տարվա մեջ ոռոգման շրջանը մեզ մոտ տեւում է մոտ երկուսուկես ամիս, մնացած ամիսներին արեւային ֆոտովոլտային կայաններում արտադրված էներգիան կարող է տնտեսվել եւ օգտագործվել ոռոգման համակարգերի արդիականացման ծրագրերի ուղղությամբ: Կարեւորն այն է, որ մեր պոմպակայանները արեւային ֆոտովոլտային կայանների տեղադրման համար ունեն բավարար հզորություն ունեցող տարածքներ, իսկ մյուս կողմից էլ մեր մարզում արեւոտ օրերի տեւական ժամանակաշրջանը չափազանց նպաստավոր է էլեկտրաէներգիայի արտադրության համար: Սա չափազանց մեծ արդյունքներ ապահովող ծրագիր կարող է դառնալ: Հարկավոր է արագ ու հետեւողական քայլերով կյանքի կոչել բոլոր այն ծրագրերը, որոնք կհամաձայնեցվեն մեր փոխհամագործակցության օրակարգում։ Ձեռք բերված պայմանավորվածության համաձայն՝ առաջիկա շաբաթվա ընթացքում Մարտունու համայնքապետարանի եւ «Գեղարքունիք» ջրօգտագործողների ընկերության կողմից տրամադրված տվյալների հիման վրա ՄԱԿ-ի «Աղետների ռիսկի նվազեցման ծրագրերի» գրասենյակի ներկայացուցիչները մասնագիտական ուսումնասիրություններ կկատարեն ոռոգման համակարգերի արդիականացման ուղղությամբ, այնուհետ, համապատասխան ընթացակարգերից հետո, կարող են մեկնարկել շինարարական աշխատանքները:
ՀՀ Գեղարքունիքի մարզպետ Կարեն Սարգսյանի շնորհավորանքի խոսքը Երիտասարդների միջազգային օրվա առթիվ 12.08.2022
Սիրելի հայրենակիցներ, Այսօր աշխարհի բոլոր երկրներում պաշտոնապես նշվում է Երիտասարդների միջազգային օրը։ Յուրաքանչյուր երկրի համար երիտասարդ սերունդը հայրենիքի կառուցման ու պաշտպանության, շենացման ու զարգացման, հանրային կյանքի բարեփոխումների, ազգային ու համամարդկային արժեքների պահպանության, բազմաթիվ այլ կարեւոր նախաձեռնությունների մտահղացման ու իրականացման ուղղություններում անգնահատելի դերակատարություն ունի։ Երիտասարդությունն այն հիմնական ու հավաքական ուժն է, որի վրա խարսխվում են մեր հայրենիքի հուսալի ներկան ու ապահով ապագան։ Հավատացած եմ, որ մեր երիտասարդության համախմբամբ ու հավաքական կամքով մենք կհասնենք մեր հայրենիքի հզորացմանն ու ծաղկմանը եւ համազգային բարօրությանը։ Հավերժ փառք այն հայ երիտասարդներին, ովքեր իրենց կյանքի գնով փրկեցին հայրենիքը, հավերժ փառք այն երիտասարդներին, ովքեր խիզախորեն կանգնեցին եւ կանգնած են հայրենի երկրի պաշտպանության դիրքերում, շնորհակալություն այն երիտասարդներին, ովքեր նվիրումով ու ջանադիր աշխատանքով արարում ու շենացնում են մեր երկիրը, ամենատարբեր ոլորտներում պայքարում բարեկեցության ու առաջընթացի համար։ Ջերմորեն շնորհավորում եմ բոլորիս Երիտասարդության միջազգային օրվա առթիվ, մաղթում խաղաղ հայրենիք, քաջառողջություն, աշխատանքային ու անձնական հաջողություններ, միշտ պայծառ տրամադրություն։
