Պաշտոնական էլ. փոստ
(միայն www.e-citizen.am համակարգով ծանուցումների համար)
Նորություններ
ՀՀ Գեղարքունիքի մարզպետ Կարեն Սարգսյանի աջակցությամբ Ֆրանսիական «Բժշկական օգնություն և զարգացում» ծրագրի պատասխանատու Ժան Կլոդ Ռոսենին և բժիշկ Պիեռ Շիլինգերին մայիսի 27-31-ը Գեղարքունիքի մարզպետի աշխատակազմի վարչական շենքում անցկացրին վերապատրաստման դասընթացներ՝ մարզի բուժհիմնարկների շուրջ 60 ընտանեկան բժիշկների և բուժքույրերի համար։ Ծրագիրն իրականացվեց ՀՀ Գեղարքունիքի մարզպետի աշխատակազմի և Ֆրանսիայի Հանրապետության Իզերի դեպարտամենտի միջև գործող ապակենտրոնացված համագործակցության առողջապահական առանցքի շրջանակներում։ Վերապատրաստման թեման՝ տնային պայմաններում առաջին բուժօգնության արագ և արդյունավետ կազմակերպումն էր։ Ինտերակտիվ վերապատրաստման ընթացքում բուժաշխատողները ցուցաբերեցին մասնագիտական մեծ ակտիվություն, պայմանական իրավիճակից դուրս գալու նպատակով առաջարկեցին գործնական տարբեր լուծումներ, սահմանեցին դրանց հաջորդականությունը․․․
Գեղարքունիքի մարզում մայիս ամսվա ընթացքում ծնվել է 108 երեխա 03.06.2024
2024 թվականի մայիս ամսին Գեղարքունիքի մարզային ենթակայության ծննդօգնություն իրականացնող առողջապահական հիմնարկներում ծնվել է 108 երեխա, որից 64-ը՝ տղա, 44-ը՝ աղջիկ: 108 երեխաներից 20-ը ծնվել են Գավառի բժշկական կենտրոնում, 32-ը՝ Մարտունու ծննդատանը, 35-ը՝ Սևանի բժշկական կենտրոնում, 20-ը՝ Վարդենիսի բժշկական կենտրոնում և 1 երեխա՝ Ճամբարակի առողջության կենտրոնում։
Մեծ Մասրիկում ծնվել է ընտանիքի 9-րդ երեխան 03.06.2024
Գեղարքունիքի մարզի Վարդենիս համայնքի Մեծ Մասրիկ բնակավայրի բնակիչներ Արմեն Մանուկյանի և Աննա Շաբոյանի ընտանիքում լույս աշխարհ է եկել ընտանիքի 9-րդ երեխան։ Նորածինը տղա է, 2770 գրամ քաշով և 51 սմ հասակով։ Փոքրիկի ծնունդը գրանցվել է 2024 թվականի մայիսի 31-ին Գեղարքունիքի մարզի Վարդենիս համայնքի բժշկական կենտրոնի ծննդատանը։ Նորածինն ունի 2 եղբայր և 6 քույր։
ՏԵՂԵԿԱՑՈՒՄ 03.06.2024
Տեղեկացվում է Լեռնային Ղարաբաղից բռնի տեղահանված և Սևան խոշորացված համայնքում վերաբնակություն հաստատած ընտանիքներին, որ 2024 թվականի հունիսի 5-ին ժամը 15։00-ին Սևանի Ս․ Զաքարյանի անվան մշակույթի պալատում տեղի կունենա հանդիպում, որի ընթացքում բանախոսները հանդիպման մասնակիցներին կիրազեկեն բնակարանային ապահովման պետական աջակցության ծրագրի մասին։ Բնակարանային ապահովման պետական աջակցության ծրագրից օգտվել ցանկացողները հանդիպման ընթացքում իրենց հետաքրքրող հարցերը կարող են ուղղել բանախոսներին և ստանալ պարզաբանումներ՝ ծրագրի բաղադրիչների, նրանից օգտվելու մանրամասների վերաբերյալ։ Գեղարքունիքի մարզպետի աշխատակազմ
ՀՀ Գեղարքունիքի մարզպետ Կարեն Սարգսյանը շնորհավորական խոսքը՝ երեխաների պաշտպանության օրվա առիթով 01.06.2024
ՀՀ Գեղարքունիքի մարզպետ Կարեն Սարգսյանը շնորհավորական ուղերձ է հղել երեխաների պաշտպանության օրվա առիթով, որտեղ ասվում է. «Սիրելի երեխաներ, սրտանց շնորհավորում եմ ձեզ աշխարհի թերևս ամենապայծառ ու լուսավոր տոնի՝ Երեխաների իրավունքների պաշտպանության միջազգային օրվա առթիվ: Մեր նպատակն է անել հնարավորը, որ ձեր մանկությունն առավել անհոգ ու ապահով լինի, որ ձեզնից յուրաքանչյուրը հնարավորություն ունենա իրականացնելու իր ամենահամարձակ երազանքն անգամ, որպեսզի ձեր մանկությունն անցնի խաղաղ ու զարգացող հայրենիքում, որպեսզի դուք մեծանաք առողջ ու երջանիկ՝ շրջապատված անսահման ջերմությամբ ու հոգատարությամբ, ստանաք որակյալ ու ժամանակակից կրթություն: Եվ համոզված եմ, որ մեր բոլոր քայլերը կնպաստեն, որ ձեզանից յուրաքանչյուրն ավելի շատ սիրի մեր հայրենիքն ու հետագայում նաև հոգ տանի նրա մասին, քանզի այն ձերն է և դու՛ք եք նրա վաղվա քաղաքացին:․․․
Տոնական միջոցառումներ` Երեխաների պաշտպանության միջազգային օրվա առթիվ 01.06.2024
Հունիսի 1 - ին, Երեխաների պաշտպանության միջազգային օրվա առթիվ, տոնական միջոցառումներ են տեղի ունեցել Գեղարքունիքի մարզի բոլոր համայնքներում։ Երաժշտական կատարումներով հանդես են եկել համայնքային ենթակայության մշակութային հաստատությունների երգի, պարի խմբերը, անհատ կատարողներ, տարբեր մարզաձևերից ցուցադրական ելույթներով հանդես են եկել մարզադպրոցների սաները, փոքրիկների համար անցկացվել են կավճենկարի մրցույթներ, ցուցադրվել են տարբեր խմբակներ հաճախող սաների ձեռքի աշխատանքները, անակնկալ ծրագրով մանուկներին ողջունել են ծաղրածուները, սիրված հեքիաթների և մուլտֆիլմերի հերոսների կերպարները, օրն անկրկնելի դարձնելով և անմոռանալի պահեր պարգևելով երեխաներին։ Միջոցառումներին մասնակցել են համայնքների ղելավարներ և համայնքապետարանների պատասխանատու աշխատակիցներ։ Տոնի առթիվ երեխաներին բաժանվել են նվերներ և պաղպաղակներ։ Հունիսմեկյան միջոցառումներ են կազմակերպվել նաև մարզի մի շարք դպրոցներում։
