Գեղարքունիքի մարզպետի աշխատակազմ

ՆԳՆ փրկարար ծառայության սիրելի՛ աշխատակիցներ,
գեներալնե՛ր, սպանե՛ր, տիկնա՛յք և պարոնա՛յք փրկարարներ, հարգարժա՛ն վետերաններ,
Ջերմորեն շնորհավորում եմ ձեզ մասնագիտական օրվա առթիվ։
Ձեր նվիրվածությունն ու պատրաստակամությունն ամեն օր՝ երբեմն կյանքի գնով, երաշխավորում են մեր քաղաքացիների անվտանգությունն ու բարօրությունը։ Անկախ իրավիճակից՝ տարերային աղետ, տեխնածին վթար, հրդեհ կամ փրկարարական այլ առաքելություն, դուք մշտապես գտնվում եք առաջին գծում՝ ցուցաբերելով արիություն, հոգատարություն և բարձր պատասխանատվություն։
Ձեր անձնվեր ծառայությունը ոչ միայն պաշտպանում է մարդկային կյանքեր, այլև ամրապնդում է վստահությունն ու հույսը մեր հասարակության մեջ։ Դուք օրինակ եք հայրենասիրության, արհեստավարժության և ծառայողական բարձր մշակույթի։
Ձեր առաքելությունը չափազանց կարևոր է՝ հատկապես մեր ժամանակներում, երբ անսպասելի իրավիճակները դարձել են կյանքի անբաժան մաս։ Դուք առաջինն եք, ովքեր կանգնում են վտանգի դիմաց՝ երբեմն ակնթարթների ընթացքում ընդունելով ճակատագրական որոշումներ, փրկելով կյանքեր, կանխելով անդառնալի հետևանքներ։
Ձեր աշխատանքը չափվում է ոչ միայն արձագանքման արագությամբ, այլև մարդկանց հանդեպ ունեցած հոգատարությամբ, թիմային համագործակցությամբ և գործին նվիրվածությամբ։ Այդ նվիրվածությունն է, որ ստեղծում է վստահություն և ամրացնում հասարակության անվտանգությանը ուղղված համակարգված ջանքերը։
Թող ձեր ծառայությունը լինի անվտանգ, ձեր ջանքերը՝ արժանապատվորեն գնահատված, իսկ պետության և հասարակության աջակցությունը՝ մշտական ուղեկից։
Մաղթում եմ խաղաղություն, առողջություն և անփորձանք ծառայություն։