Գեղարքունիքի մարզպետի աշխատակազմ

Դպրոցականների շրջանում շախմատ մարզաձևի մասսայական զարգացման, արտադպրոցական և արտադասարանական աշխատանքների բարելավման, պատանի շախմատիստների մարզական կատարելագործման, ինչպես նաև Հայաստանի պատանիների շախմատի առաջնության կիսաեզրափակիչ մրցումներին մարզի մասնակցությունն ապահովելու նպատակով, ամեն տարի, ՀՀ Գեղարքունիքի մարզպետի որոշմամբ անցկացվում է Գեղարքունիքի մարզի մինչև 8, 10, 12, 14 և 16 տարեկան պատանիների շախմատի մարզային առաջնություն:

Առաջնությունն անցկացվել է երկու փուլով՝ համայնքային և մարզային: Համայնքային փուլի մրցումներն անցկացվել են 2025 թվականի փետրվարի 15-24-ը` Հայաստանի շախմատի ակադեմիայի Գավառի, Սևանի, Ճամբարակի, Մարտունու, Սարուխանի, Վարդենիսի և Վարդենիկի մասնաճյուղերում:

Մարտի 1-ին, 2-ին և 9-ին Գավառի Պապին Ղանդիլյանի անվան թիվ 2 միջնակարգ դպրոցում կայացել է առաջնության մարզային փուլը, որին մասնակցել են համայնքային փուլի արդյունքում ձևավորված թիմերը:

Թիմերն ըստ տարիքային խմբերի ձևավորվել էին հետևյալ համամասնությամբ՝ մինչև 8 տարեկան՝ 1 տղա, մինչև 10 տարեկաններ՝ 3 տղա, մինչև 12 տարեկաններ՝ 3 տղա, մինչև 14 տարեկաններ՝ 3 տղա, մինչև 16 տարեկաններ՝ 2 տղա: Ընդ որում՝ մինչ 10 տարեկան պատանիների մրցաշարում մասնակցության իրավունք ունեին առնվազն 3-րդ կարգ ունեցող, մինչ 12, 14 և 16 տարեկան պատանիների մրցաշարում՝ առնվազն 2-րդ կարգ ունեցող շախմատիստները։

Ընդհանուր առմամբ մարզային փուլին մասնակցել են 80 պատանի շախմատիստներ։

Առաջնությունն անցկացվել է ՖԻԴԵ-ի կանոնակարգի դասական շախմատի կանոնների համաձայն, անհատական կարգով։ Յուրաքանչյուր խաղացողին մեկ խաղափուլում տրվել է 60 րոպե ժամանակ` յուրաքանչյուր քայլի համար 5 վայրկյան հավելումով:

Առաջնության մարզային փուլի գլխավոր մրցավարն էր Հայաստանի շախմատի ակադեմիայի ներկայացուցիչ Մերուժան Հայրապետյանը, քարտուղարը` Կարո Սարգսյանը:

Մարզային փուլում մինչև 8 և 16 տարեկանների տարիքային խմբերում մրցումներն անցկացվել են շրջանաձև մրցակարգով, իսկ մինչև 10, 12 և 14 տարեկանների տարիքային խմբերում` շվեյցարական մրցակարգով:

Մինչև 8 տարեկանների մրցապայքարում 1-ին տեղը գրավել է Արման Մանուկյանը (Գավառ), 2-րդ հորիզոնականը՝ Դավիթ Սարիբեկյանը (Մարտունի), իսկ 3-րդ հորիզոնականը` Վաղարշակ Աղեկյանը (Գավառ):

Մինչև 10 տարեկանների տարիքային խմբում ուժեղագույնն էր Ալեքս Մխիթարյանը (Վարդենիս), 2-րդ տեղ էր Արեն Մարգարյանը (Վարդենիկ), իսկ 3-րդ մրցանակային տեղը՝ Ալեն Գրիգորյանը (Վարդենիկ):

Մինչև 12 տարեկանների խմբում 1-ին տեղը գրավել է Վաչե Ավդալյանը (Գավառ՝ Սարուխան), 2-րդ տեղը՝ Սաղաթել Թադևոսյանը (Վարդենիս), իսկ 3-րդ մրցանակային տեղը՝ Սերգեյ Սահակյանը (Ճամբարակ): Այս տարիքային խմբում հաջորդ փուլի մասնակցության իրավունք է ստացել նաև Գրիշա Շահումյանը (Մարտունի)։

Մինչև 14 տարեկանների տարիքային խմբում հաղթող է ճանաչվել Արսեն Մովսիսյանը (Վարդենիկ), 2-րդ տեղը գրավել է Լևոն Վարդանյանը (Սևան), 3-րդ տեղը՝ Արամ Ղազարյանը (Մարտունի):

Մինչև 16 տարեկանների տարիքային խմբում առաջին հորիզոնականը զբաղեցրել է Ռազմիկ Սիրականյանը (Մարտունի), 2-րդ տեղը՝ Հարություն Մխիթարյանը (Վարդենիկ), 3-րդ մրցանակային տեղը՝ Կարեն Սահակյանը (Ճամբարակ):

Մրցաշարի արդյունքում ձևավորվել է մարզի հավաքական թիմը, որը Հայաստանի պատանիների շախմատի առաջնության կիսաեզրափակիչ մրցումներին կներկայացնի Գեղարքունիքի մարզը:

Առաջնության մրցանակակիրներին Գեղարքունիքի մարզպետի անունից հանձնվել են հավաստագրեր և մեդալներ: