Գեղարքունիքի մարզպետի աշխատակազմ

 Նախազորակոչային և զորակոչային տարիքի երիտասարդության կենցաղում առողջ ապրելակերպի արմատավորման, ինչպես նաև դպրոցականների և երիտասարդության շրջանում իրականացվող ռազմահայրենասիրական դաստիարակության հետագա բարելավման նպատակով Հայաստանի Հանրապետությունում անցկացվում են ռազմամարզական խաղեր։ Դրանք անցկացվում է 4 փուլով՝ ներդպրոցական, համայնքային, մարզային և հանրապետական։ Ռազմամարզական խաղերին մասնակցում են հանրակրթական դպրոցների 9-12-րդ դասարանցիներից ձևավորված թիմերը։ Թիմերի կազմերում հանդես են գալիս 9-ական տղա մարզիկ:
ՀՀ Գեղարքունիքի մարզում ռազմամարզական խաղերի ներդպրոցական փուլն անցկացվեց մինչ սեպտեմբերի 25-ը։ Այս փուլում ձևավորված դպրոցական թիմերը հոկտեմբերի 3-4-ը մասնակցեցին համայնքային փուլին, որն անցկացվեց Գավառ, Մարտունի, Սևան, Վարդենիս և Ճամբարակ համայնքներում։ Համայնքային փուլում 1-ին և 2-րդ տեղեր գրաված թիմերն իրավունք էին ստացել՝ մասնակցելու մարզային փուլի մրցումներին, որն անցկացվեց հոկտեմբերի 11-ին՝ Գավառի Մ․ Բունիաթյանի անվան N8 միջնակարգ դպրոցի մարզադաշտում։ Մրցապայքարը տեղի ունեցավ ռազմամարզական խաղերի ծրագրով նախատեսված նռնակի նետում հեռավորության վրա, 8 կիլոգրամանոց ուսապարկով փոխանցավազք, ձգումներ պտտաձողից, վազք 1000 մետր, հրաձգություն օդամղիչ հրացանով և ինքնաձիգի ոչ լրիվ քանդում-հավաքում վարժաձևերից։ Ծավալվեց հետաքրքիր և համառ պայքար, որի արդյունքում հավաքած 1504 միավորով հաղթող ճանաչվեց Ճամբարակի ավագ դպրոցի թիմը։ 1098 միավորով երկրորդ տեղում էր Սարուխան գյուղի Ս. Մակարյանի անվան N 1 միջնակարգ դպրոցի թիմը, իսկ երրորդ հորիզոնականը 960 միավորով զբաղեցրեց Սևան քաղաքի N 6 միջնակարգ դպրոցի թիմը։ Հաղթող թիմերին ՀՀ կրթության, գիտության, մշակույթի և սպորտի նախարարության կողմից հանձնվեցին համապատասխան կարգի հավաստագրեր։
Մարզային փուլում հաղթած Ճամբարակի ավագ դպրոցի թիմը զինղեկ Նիկալ Ճաղարյանի գլխավորությամբ ՀՀ Գեղարքունիքի մարզը կներկայացնի հոկտեմբերի 23-26-ը կայանալիք ռազմամարզական խաղերի հանրապետական եզրափակիչ փուլում։