Գեղարքունիքի մարզպետի աշխատակազմ

ՀՀ Կրթության, գիտության, մշակույթի և սպորտի նախարարության կողմից իրականացվող «ԴասԱրվեստ» կրթամշակութային ծրագիրը  հյուրընկալվել է  ՀՀ Գեղարքունիքի մարզի Լճաշեն գյուղի Ա.Տեր-Գրիգորյանի անվան  միջնակարգ դպրոցում:

Ծրագրի  նպատակն է՝ կամրջել թանգարաններն ու կրթական հաստատությունները`  նպաստելով  արվեստի և կրթության կապի ամրապնդմանը:

Ծրագրին  մասնակցել են   դպրոցի 5-րդ դասարանի  աշակերտները, որոնց հնարավորություն    է ընձեռվել՝ ծանոթանալու   Հայաստանի Ազգային պատկերասրահին և նրա գործունեությանը։  Աշակերտներին ներկայացվել են   պատկերասրահի պատմությունը, կառուցվածքը, «թանգարանային առարկա» հասկացությունը, դրա անվտանգության ու պահպանման կանոնները: Նախագծի կարևոր և բաղկացուցիչ մաս է եղել   Հայաստանի ազգային պատկերասրահի ֆոնդապահոցներում պահվող բարձրարժեք թանգարանային առարկաների ցուցադրությունը:

Ծրագրում ընդգրկված են 3-13-րդ դարերի հայկական մոնումենտալ արվեստի օրինակներ, ինչպես նաև՝ 19-րդ դարի երկրորդ կեսի և 20-րդ դարի հայկական կերպարվեստի առանցքային հեղինակ  Եղիշե Թադևոսյանի խճանկարը:

Ծրագրի շրջանակում ներկայացվել են  որմնանկարներ, կազմակերպվել   դասախոսություն, որը վարել են  պատկերասրահի լավագույն մասնագետներ Սեդա Արսենյանը, Էլեն Ամատունին և Վազգեն Հախոյանը:

«ԴասԱրվեստ» կրթամշակութային ծրագրի շրջանակում կազմակերպված թեմատիկ ցուցադրությունների, դրանց նվիրված կրթական ծրագրերի,  դասախոսության և ինտերակտիվ ծրագրի միջոցով սովորողները ծանոթացել են  խճանկարի տեխնիկային:

Ծրագրի ավարտից հետո մասնակից աշակերտները  ստացել են  պատկերասրահի կողմից   փոքրիկ հուշանվերներ: