Գեղարքունիքի մարզպետի աշխատակազմ

Գեղարքունիքի մարզպետ Կարեն Սարգսյանը մշտադիտարկում անցկացրեց Մարտունի համայնքի Գեղհովիտ գյուղի թիվ 2 միջնակարգ դպրոցի նորակառույց շենքի շինհրապարակում։
Նրան ուղեկցում էին Գեղարքունիքի մարզպետի տեղակալ Ջանիկ Բազեյանը, Մարտունի համայնքի ղեկավար Հովհաննես Հովեյանը, Գեղարքունիքի մարզպետի աշխատակազմի քաղաքաշինության, հողաշինության և ենթակառուցվածքների կառավարման վարչության պետ Սասուն Սահակյանը, ՀՀ Քաղաքաշինության կոմիտեի ներկայացուցիչներ։
Գեղհովիտի թիվ 2 միջնակարգ դպրոցի նոր շենքի կառուցումն իրականացվում է պետբյուջեի միջոցներով, ՀՀ քաղաքաշինության կոմիտեի պատվիրատվությամբ։ Ծրագրի իրականացման պայմանագրային արժեքը կազմում է 1 միլիարդ 350 միլիոն դրամ։
Այս պահի դրությամբ շինաշխատանքներն իրականացվել են շուրջ 58 տոկոսով և կավարտվեն 2025 թվականի օգոստոսին։
Մարզպետը հրահանգեց՝ անել հնարավորը, որպեսզի կառույցը շահագործման հանձնվի սահմանված ժամկետներում և պահանջվող որակին համապատասխան, միաժամանակ շեշտելով, որ արդի չափորոշիչներին համապատասխան դպրոցական շենքի շահագործմանը անհամբեր սպասում են ծնողները, մանկավարժները և աշակերտները։
Գեղհովիտի թիվ 2 միջնակարգ դպրոցը կունենա արդի չափորոշիչներին համապատասխանող բոլոր պայմանները՝ 503 աշակերտ տեղով։