Նորություններ
Դասընթաց՝ էներգաարդյունավետ վառարանների արտադրության տեխնիկական ասպեկտների վերաբերյալ
31.05.2024
![](http://gegharkunik.mtad.am/files/n_pics/38572_s.jpg)
«Գերմանական Խնայողական բանկերի միջազգային համագործակցության միավորման» Հայաստանյան ներկայացուցչության կողմից իրականացվող «Փոքրամասշտաբ էներգաարդյունավետ լուծումներ Հայաստանի Հանրապետության գյուղաբնակների համար» ծրագրի շրջանակներում, Գեղարքունիքի մարզպետի աշխատակազմի հետ համագործակցությամբ, Գավառի համայնքապետարում տեղի է ունեցել էներգաարդյունավետ վառարանների արտադրության տեխնիկական ասպեկտների վերաբերյալ դասընթաց։
Տեխնիկական դասընթացին մասնակցել են Գեղարքունիքի մարզի տարբեր բնակավայրերից թվով 15 մետաղագործ վարպետներ, որոնց թվում նաև Լեռնային Ղարաբաղից բռնի տեղահանվածներ։
Դասընթացների նպատակն է զարգացնել մետաղագործ վարպետների տեխնիկական հմտություններն էներգաարդյունավետ վառարանների արտադրության և էներգաարդյունավետության տեխնիկական ասպեկտների վերաբերյալ։
«Եթե սովորական վառարանների օգտակար գործողության գործակիցը մոտավորապես 60% է, ապա դասընթացի ժամանակ ներկայացված էներգաարդյունավետ վառարանների ՕԳԳ-ն համապատասխանաբար 77 և 84% է։ Հետևաբար, եթե որպես ջեռուցման միջոց օգտագործվում է վառարան, ապա ավելի նպատակահարմար է օգտագործել Էներգաարդյունավետ վառարաններ։ Դրանով կնպաստեք բնության պահպանությանը և ընտանիքի բարեկեցությանն ու առողջությանը», հանդիպման ընթացքում նշել են բանախոսները։
Ծրագիրը «ԵՄ-ն հանուն էներգաարդյունավետության և շրջակա միջավայրի» ԵՄ գործողության և Գերմանիայի Դաշնային Հանրապետության տնտեսական համագործակցության և զարգացման նախարարության (ԳԴՀ ՏՀԶՆ) կողմից պատվիրակված և Գերմանիայի միջազգային համագործակցության ընկերության (ԳՄՀԸ) կողմից իրականացվող «Բնական պաշարների կառավարում և էկոհամակարգային ծառայությունների պահպանություն Հարավային Կովկասում գյուղական տարածքների կայուն զարգացման համար» (ԷԿՈսերվ) ծրագրի մաս է։
Ծրագիրը նպաստում է ԵՄ գործողության ընդհանուր նպատակին, այն է՝ բարելավել էներգաարդյունավետությունը և նպաստել շրջակա միջավայրի պահպանությանն ու կայունությանը: