Գեղարքունիքի մարզպետի աշխատակազմ

Մարզպետի հետ ունեցած հանդիպման ընթացքում «Մարտունու կանանց համայնքային խորհուրդ» հասարակական կազմակերպության նախագահ Անահիտ Գևորգյանը ներկայացրեց 24 ամյա պատմություն ունեցող հասարակական կազմակերպության գործունեությունը՝ կրթության, առողջապահության, սոցիալական, հումանիտար, բնապահպանական և համայնքային զարգացման ոլորտներում։
Նրա խոսքով ծրագրերի իրականացման ընթացքում կարևորվել է բնակչության անմիջական ներգրավվածությունը տարբեր խնդիրների լուծման գործընթացներում, որն էլ իր նպաստն է ունեցել համայնքների զարգացման գործում բնակչության մասնակցային վարքի ձևավորման և նշված ոլորտներում խնդիրների արդյունավետ լուծման հարցերում։
«Մեր գործունեության ընթացքում հատուկ ուշադրություն է դարձվել բնակչության խոցելի խմբերին, նրանց սոցիալական վիճակի, հուզող խնդիրների բարելավմանը, զբաղվածության ապահովմանը։
Գործունեության հենց սկզբից մեր կազմակերպությունը հիմնել է մեծահասակների կրթության կենտրոն, որը տարեկան կրթական ծառայություններ է մատուցում 300-ից ավել շահառուի:
Հիմնել ենք Գեղարքունիքի մարզում բռնության ենթարկված կանանց աջակցման կենտրոն, որի միջոցով մեր տարբեր մասնագետները ծառայություններ են մատուցում տարեկան ավելի քան 100 շահառուի։
Աջակցություն է տրամադրվել և շարունակվում է տրամադրվել միայնակ ծերերին և Լեռնային Ղարաբաղից տեղահանված անձանց։
ԱՄՆ ՄԶԳ-ի հետ Ճամբարակ համայնքում իրականացնում ենք «Համագործակցություն հանուն կայուն համայնքերի» քառամյա ծրագիրը, որի շրջանակներում համայնքային կառույցների ծառայություններն ավելի հասանելի դարձնելու նպատակով Ճամբարակի բոլոր վարչական կենտրոններին, համայնքապետարանին, 18 դպրոցներին և 3 մանկապարտեզներին տրամադրել ենք համակարգչային սարքավորումներ, իսկ Թթուջուր բնակավայրի մանկապարտեզին՝ էլեկտրոնային դաշնամուր։
Խոցելի խմբերին խոշոր հումանիտար աջակցություն է տրամադրվել հիգիենիկ պարագաների, սննդի փաթեթների, գրենական պիտույքների, կենցաղային պարագաների տեսքով։
Ձևավորվել է համագործակցային հարաբերություններ ՏԻՄ և համայնքային այլ կառույցների ներկայացուցիչների հետ։
Ճամբարակ համայնքում կազմակերպվել են կանանց վերապատրաստման և մասնագիտացման դասընթացներ, նրանց աշխատանքով ապահովելու նպատակով տրամադրել ենք անհրաժեշտ սարքավորումներ և տեղացիներին և Լեռնային Ղարաբաղից տեղահանված հայրենակիցներին»,- հավելեց ՀԿ նախագահը։
Ի թիվս այլ ծրագրերի, այս պահին ընթացքի մեջ է երկու թաքստոցի վերանորոգման և կահավորման աշխատանքները, հավելեց Անահիտ Գևորգյանը, ով անդրադառնալով առաջիկա անելիքներին, նշեց, որ նպատակ ունեն գործունեություն ծավալել նաև երեխաների զարգացման ոլորտում, որի իրկանացման հարցում ակնկալում են պետական կառավարման և տեղական ինքնակառավարման մարմինների աջակցությունը։
Գեղարքունիքի մարզպետ Կարեն Սարգսյանը իր երախտագիտությունը հայտնեց զրուցակցին՝ երկարամյա արդյունավետ գործունեության, մարզի համայնքներում բազմոլորտ ծրագրեր կյանքի կոչելու, բնակչության շրջանում սոցիալական խնդիրների մեղմման համար և պատրաստակամություն հայտնեց աջակցել նոր ծրագրերի իրականացմանը՝ իր լիազորությունների և հնարավորությունների սահմաններում։