Գեղարքունիքի մարզպետի աշխատակազմ

Դպրոցականների շրջանում շախմատ մարզաձևի մասսայական զարգացման, արտադպրոցական և արտադասարանական աշխատանքների բարելավման, պատանի շախմատիստների մարզական կատարելագործման, ինչպես նաև Հայաստանի պատանիների շախմատի առաջնության կիսաեզրափակիչ մրցումներին մարզի մասնակցությունն ապահովելու նպատակով ամեն տարի անցկացվում է Գեղարքունիքի մարզի մինչև 8, 10, 12, 14 և 16 տարեկան պատանիների շախմատի մարզային առաջնություն:
Առաջնությունն անցկացվել է երկու փուլով՝ համայնքային և մարզային: Համայնքային փուլի մրցումներն անցկացվել են 2024 թվականի փետրվարի 20-25-ը` Հայաստանի շախմատի ակադեմիայի Գավառի, Սևանի, Ճամբարակի, Մարտունու, Սարուխանի, Վարդենիսի և Վարդենիկի մասնաճյուղերում:
Մարտի 2-ին, 3-ին և 9-ին Գավառի Պապին Ղանդիլյանի անվան թիվ 2 միջնակարգ դպրոցում կայացել է առաջնության մարզային փուլը, որին մասնակցել են համայնքային փուլի արդյունքում ձևավորված թիմերը: Ընդհանուր առմամբ մարզային փուլին մասնակցել են 75 պատանի շախմատիստներ։
Առաջնությունն անցկացվել է ՖԻԴԵ-ի կանոնակարգի դասական շախմատի կանոնների համաձայն, անհատական կարգով։ Յուրաքանչյուր խաղացողի մեկ խաղափուլում տրվել է 60 րոպե ժամանակ` յուրաքանչյուր քայլի համար 5 վայրկյան հավելումով:
Առաջնության մարզային փուլի գլխավոր մրցավարն էր Հայաստանի շախմատի ակադեմիայի ներկայացուցիչ Մերուժան Հայրապետյանը, քարտուղարը` Կարո Սարգսյանը: Մարզային փուլում մինչև 8, 14 և 16 տարեկանների տարիքային խմբերում մրցումներն անցկացվել են շրջանաձև մրցակարգով, իսկ մինչև 10 և 12 տարեկանների տարիքային խմբերում` շվեյցարական մրցակարգով:
Մինչև 8 տարեկանների մրցապայքարում 1-ին տեղը գրավել է Ալեքս Մխիթարյանը (Վարդենիս), 2-րդ հորիզոնականը՝ Նարեկ Մանուկյանը (Վարդենիկ), իսկ 3-րդ հորիզոնականը` Յուրա Սարգսյանը (Վարդենիկ):
Մինչև 10 տարեկանների տարիքային խմբում ուժեղագույնը եղել է Սաղաթել Թադևոսյանը (Վարդենիս), 2-րդ տեղը գրավել է Արեն Չոմոյանը (Վարդենիկ), 3-րդ մրցանակային տեղը՝ Գևորգ Դադոյանը (Գավառ):
Մինչև 12 տարեկանների խմբում 1-ին տեղը գրավել է Գարիկ Խաչատրյանը (Մարտունի՝ Լիճք), 2-րդ տեղը՝ Վաչե Ավդալյանը (Գավառ՝ Սարուխան), իսկ 3-րդ մրցանակային տեղը՝ Սերգեյ Սահակյանը (Ճամբարակ):
Մինչև 14 տարեկանների տարիքային խմբում հաղթող է ճանաչվել Նարեկ Բազիկյանը (Գավառ), 2-րդ տեղը՝ Տիգրան Սարիբեկյանը (Մարտունի), 3-րդ տեղը՝ Արամ Ղազարյանը (Մարտունի):
Մինչև 16 տարեկանների տարիքային խմբում առաջին հորիզոնականը զբաղեցրել է Հայկ Մուքայելյանը (Վարդենիկ), 2-րդ տեղը՝ Սուրեն Մովսիսյանը (Վարդենիկ), 3-րդ մրցանակային տեղը՝ Ռազմիկ Սիրականյանը (Լիճք): Այս տարիքային խմբում 1-ին կարգային շախմատիստ Հրանտ Մխիթարյանը (Վարդենիս), միանգամից կմասնակցի առաջնության կիսաեզրափակիչ փուլին։
Մրցաշարի արդյունքում ձևավորվել է մարզի հավաքական թիմը, որը Հայաստանի պատանիների շախմատի առաջնության կիսաեզրափակիչ մրցումներին կներկայացնի Գեղարքունիքի մարզը:
Առաջնության մրցանակակիրներին Գեղարքունիքի մարզպետի անունից հանձնվել են հավաստագրեր և մեդալներ: