Նորություններ
Կայացել է «Մշակութային երկխոսություն» խորագրով միջմարզային հերթական միջոցառումը
12.12.2023
Դեկտեմբերի 11-ին Կոտայքի մարզի Չարենցավանի Գառզուի անվան արվեստի դպրոցում տեղի է ունեցել հերթական՝ «Մշակութային երկխոսություն» խորագրով միջմարզային միջոցառումը, որը կազմակերպվել է Գեղարքունիքի մարզպետի աշխատակազմի ԿՄՍ վարչության կողմից: Այն իրականացվել է հանրապետության մարզերում մշակութային միջոցառումների ծրագրի շրջանակներում՝ ՀՀ պետական բյուջեից տրամադրած միջոցների հաշվին։
Միջմարզային միջոցառումը նպատակն էր ամրապնդել Գեղարքունիքի և Կոտայքի մարզերի արվեստի և երաժշտական դպրոցների միջև կապը՝ փորձի փոխանակման, մարզերում մշակույթի համաչափ զարգացման, բարեկամական ուղիների ստեղծման ու ճանաչողության միջմարզային մշակութային առանձնահատկությունների երկկողմանի ծանոթության, մարզին բնորոշ արվեստը ներկայացնելու միջոցով:
Միջոցառման ընթացքում հանդես են եկել Գեղարքունիքի մարզի արվեստի և երաժշտական դպրոցների շնորհալի երգիչ-երգչուհիները, գործիքային կատարողները լավագույն սաները:
Վերջիններիս հետ համատեղ երաժշտական կատարումներով հանդես են եկել նաև Կոտայքի մարզի արվեստի և երաժշտական դպրոցների շնորհալի կատարողներ, պարային խմբեր և ժողովրդական գործիքների նվագախումը:
Միջմարզային միջոցառման մասնակից բոլոր սաները խրախուսվել են ՀՀ Գեղարքունիքի մարզպետի հավաստագրերով և խրախուսական նվերներով։
Շնորհակալագիր և խրախուսական նվեր է հանձնվել նաև Գառզուի անվան արվեստի դպրոցի տնօրենին, Կոտայքի մարզպետի աշխատակազմի և Չարենցավանի համայնքապետարանի աշխատակիցներին:
Հաջորդ տարի Կոտայքի մարզի երաժշտական և արվեստի դպրոցների շնորհալի սաները փոխադարձ այցով կլինեն Գեղարքունիքի մարզում։