Գեղարքունիքի մարզպետի աշխատակազմ

Ի կատարումն ՀՀ կառավարության հանձնարարականի և ՀՀ Գեղարքունիքի մարզպետի որոշման՝ մարզպետի աշխատակազմում ստղծվել է աշխատանքային խումբ, որի անդամները 2023 թվականի սեպտեմբերի 5-ին Գավառ համայնքում հանդիպել են շահագրգիռ գյուղացիական և ֆերմերային տնտեսությունների առանձին գյուղացիների ու տնտեսավարողների հետ, ովքեր զբաղվում են անասնապահությամբ:
Տնտեսվարողներին ներկայացվել է փոքր և միջին «խելացի» անասնաշենքերի կառուցման կամ վերակառուցման և դրանց տեխնոլոգիական ապահովման աջակցության ծրագրի իրագործման ձևերի ու հնարավորությունների մասին, ցուցաբերվել աջակցություն՝ այդ ծրագրից օգտվելու կարգի վերաբերյալ:
Գավառ համայնքում հանդիպմանը մասնակցում են 45 տնտեսավարողներ, ինչպես նաև բնակավայրերի վարչական ղեկավարներ, համայնքապետարանի համապատասխան մասնագետներ և այլ շահագրգիռ անձինք:
Համայնքների ղեկավարների հետ քննարկվել է նաև ՀՀ կառավարության հանձնարարականը՝ Փոքր և միջին «Խելացի» անասնաշենքերի կառուցման կամ վերակառուցման և դրանց տեխնոլոգիական ապահովման աջակցության ծրագրի շրջանակներում համայնքային նշանակության հողերի վրա որոշակի կլաստերներ ստեղծելու ուղղությամբ՝ «խելացի» անասնագոմերը կառուցելով այնպիսի հեռավորությունների վրա, որ մթերող կազմակերպությունների աշխատանքները լինեն արդյունավետ:
Մի կարևոր նկատառում. «Խելացի» անասնագոմ կառուցելու նպատակով տնտեսավարողները դիմում են համայնքապետարան բնակավայրերի հարակից տարածքներից անասնագոմ կառուցելու նպատակով համապատասխան հողամաս ձեռք բերելու համար, սակայն նշված տարածքները հանդիսանում են արոտավայրեր և ընդգրկված են ՀՀ հողային օրենսգրքի 60-րդ հոդվածով նախատեսված հողամասերի ցանկում, որոնք սեփականության իրավունքով փոխանցման ենթակա չեն:
Խնդրին լուծում տալու նպատակով անհրաժեշտ է օրենսդրական կարգավորումներ նախաձեռնել:
Քննարկումների ընթացքում անրադարձ է եղել նաև գյուղատնտեսական մթերքների /կաթ, ցորեն/ իրացման ցածր գներին, առաջարկվել է գների կայունություն ապահովելու նպատակով մարզում ստեղծել գյուղմթերքներ արտադրողների և իրացնողների ընկերություններ:
Քննարկվել է նաև արոտավայրերում կենդանիներին ջրով ապահովելու անհրաժեշտության խնդիրը:
Քննարկումներ են տեղի ունեցել նաև Գյուղատնտեսության ոլորտի պետական աջակցության մյուս 14 ծրագրերի վերաբերյալ: