Գեղարքունիքի մարզպետի աշխատակազմ

Գեղարքունիքի մարզպետ Կարեն Սարգսյանը Մարտունի համայնքի ղեկավար Հովհաննես Հովեյանի հետ մշտադիտարկում անցկացրեց Վաղաշեն գյուղի երկու կառույցների շինհրապարակներում։ Մշտադիտարկումներին մասնակցում էին նաև Գեղարքունիքի մարզպետի աշխատակազմի և Մարտունու համայնքապետարանի քաղաքաշինության ոլորտի պատասխանատուներ, բնակավայրերի վարչական ղեկավարներ, տեխնիկական հսկողություն իրականացնողներ, կապալառու ընկերությունների տնօրեններ։
Մշտադիտարկման առաջին կանգառը Մարտունի համայնքի Վաղաշեն գյուղի 3-րդ, 19-րդ և 35-րդ փողոցների ոռոգման առուների կառուցման շինհրապարակում էր, որտեղ շինարարական աշխատանքներ են ընթանում ՀՀ կառավարության կողմից 2022 թվականին իրականացվող սուբվենցիոն ծրագրերի շրջանակներում։
Վաղաշենի ներհամայնքային ոռոգման առուների կառուցման ծրագրի պայմանագրային արժեքը կազմում է 57 միլիոն 480 հազար դրամ, որի 70 տոկոսը հատկացնում է ՀՀ կառավարությունը, 30 տոկոսը՝ Մարտունու համայնքապետարանը։ Ծրագրով նախատեսված է կառուցել 1800 մետր երկարության ոռոգման ջրատար՝ երկաթբետոնյա կիսախողովակներով։ Շինարարական աշխատանքները մեկնարկել են 2022 թվականի վերջերից և 2023 թվականի օգոստոսի 23-ի դրությամբ իրականացվել են շուրջ 90 տոկոսով։ Ծրագրի իրականացման արդյունքում Վաղաշենի հարյուրավոր տնտեսությունների ոռոգման ջուրը կմատակարարվի անկորուստ ու ժամանակին։
Մշտադիտարկման երկրորդ կանգառը Վաղաշենի 3-րդ, 19-րդ ու 2-րդ փողոցից 3-րդ փողոց տանող ճանապարհների հիմնանորոգված հատվածներում էր, որտեղ շինարարական աշխատանքներն իրականացվել են ՀՀ կառավարության կողմից 2023 թվականին իրականացվող սուբվենցիոն ծրագրերի շրջանակներում։
Վաղաշենի ներհամայնքային ճանապարհների հիմնանորոգման ծրագրի պայմանագրային արժեքը կազմում է 140 միլիոն 515 հազար դրամ, որի 50 տոկոսը հատկացնում է ՀՀ կառավարությունը, 50 տոկոսը՝ Մարտունու համայնքապետարանը։ Ծրագրով նախատեսված է ասֆալտապատմամբ հիմնանորոգել 1212 գծամետր ճանապարհ՝ 9242 քառակուսի մետր մակերեսով։ Շինարարական աշխատանքները մեկնարկել են 2023 թվականի հուլիսից և 2023 թվականի օգոստոսի 23-ի դրությամբ արդեն գտնվում են ավարտական փուլում։
Մշտադիտարկման ընթացքում մարզպետը շինարարական աշխատանքների ժամանակ ի հայտ եկած խնդիրները տեղում քննարկեց համայնքի ղեկավարի, շինարարների, վարչական ղեկավարների հետ, արեց դիտողություններ և առաջարկություններ, նկատված թերությունները վերացնելու նպատակով տվեց համապատասխան հանձնարարականներ և սահմանեց ժամկետներ։
Կարեն Սարգսյանն իր գոհունակությունը հայտնեց շինարարական աշխատանքների ընթացքից ու որակից։