Գեղարքունիքի մարզպետի աշխատակազմ

Գեղարքունիքի մարզպետ Կարեն Սարգսյանն աշխատանքային այցով եղավ Ճամբարակ քաղաքում, որտեղ, հերթական անգամ, դիտարկեց ՀՀ կառավարության կողմից 2021-2022 թվականներին սուբվենցիոն ծրագրերի շրջանակներում իրականացվող աշխատանքների ընթացքը։
Մարզպետին ուղեկցում էր Ճամբարակ համայնքի ղեկավար Վազգեն Ադամյանը, մարզպետի աշխատակազմի և Ճամբարակի համայնքապետարանի պատասխանատու աշխատակիցներ։
Մարզպետը նախ այցելեց Արցախյան 44-օրյա պատերազմում Ճամբարակցի 36 զոհերի հիշատակին կառուցվող հուշահամալիրի շինհրապարակ, ծանոթացավ կատարվող աշխատանքներին։
Հուշահամալիրի կառուցման եւ «Տոռնադո» պատկերով հուշարձան-քանդակի ձեռքբերման ծրագրի իրականացման պայմանագրային արժեքը կազմում է 88 միլիոն դրամ, որի 55 տոկոսը հատկացնում է ՀՀ կառավարությունը, 45 տոկոսը՝ Ճամբարակի համայնքապետարանը։
Ծրագիրը մեկնարկել է 2022 թվականի աշնանը և իրականացվել են ընդհանուր աշխատանքների ավելի քան 60 տոկոսը։
Ծրագիրը նախատեսվում է ավարտին հասցնել 2023 թվականի օգոստոսի վերջերին։
Այնուհետև Գեղարքունիքի մարզպետն այցելեց Ճամբարակի թիվ 1 հիմնական դպրոցի նորակառույց շենքի շինհրապարակ, որտեղ ընթանում էին հիմքի կառուցման աշխատանքներ։
Մոտ 450 աշակերտ տեղով դպրոցի շինարարական աշխատանքները սկսվել են 2023 թվականի մարտ ամսին և նախատեսված է ավարտին հասցնել 2025 թվականի մայիս ամսին։
Ծրագրի արժեքը կազմում է 1 միլիարդ 800 միլիոն դրամ։
Ծրագիրը ֆինանսավորվում է Հայաստանի Հանրապետության կառավարության և Ասիական Զարգացման Բանկի կողմից։
Շինարարական օբյեկտներ կատարած այցի ընթացքում մարզպետ Կարեն Սարգսյանը զրուցեց շինարարների հետ, ծանոթացավ շինարարության ընթացքում ի հայտ եկած խնդիրներին, նկատված թերությունների շուրջ արեց դիտողություններ եւ առաջարկություններ՝ սեղմ ժամկետներում դրանք շտկելու համար։