Գեղարքունիքի մարզպետի աշխատակազմ

Գեղարքունիքի մարզում ամառային զորակոչը մեկնարկեց հունիսի 26-ին, Մարտունի համայնքից։
Նորակոչիկներն այցելեցին Մարտունի քաղաքի Սուրբ Աստվածածին եկեղեցի, որտեղ ստացան Գեղարքունյաց թեմի Մարտունու տարածքի հոգևոր հովիվներ Տեր Գևորգ քահանա Տեր Բարսեղյանի, Տեր Գնել Քահանա Մարտիրոսյանի և Տեր Երեմիա քահանա Սարգսյանի օրհնությունները։

Նորակոչիկներին ուղերձ է հղել Գեղարքունիքի մարզպետ Կարեն Սարգսյանը։

Հայոց բանակի սիրելի նորակոչիկներ, այսօր ձեր կյանքում սկսվում է շրջադարձային ու հիշարժան իրադարձություն, քանի որ դուք շուտով կրելու եք մեր բանակի զինվորական համազգեստը և դառնալու եք հայրենիքի պաշտպաններ, մեր հերոս հրամանատարների ու զինվորների գորրծերի արժանի շարունակողներ, հայրենիքի սահմաններն անառիկ պահող մարտիկներ։
Համոզված եմ, որ դուք արժանի դաստիարակություն եք ստացել ձեր ընտանիքներում ու դպրոցներում և զինվորական ծառայության ընթացքում կցուցաբերեք բավարար վճռականություն ու կամք, գիտակցություն ու պարտաճանաչություն, ինչից կախված կլինի մեր բանակի հզորությունն ու մարտունակությունը։
Հաջողություններ եմ ցանկանում ձեզ ՝ միաժամանակ մաղթելով քաջառողջություն, խաղաղ ու անվտանգ ծառայություն, նորանոր ձեռքբերումներ։ Քաջալերում եմ ձեր ծնողներին ու հարազատներին, որոնց կողքին անհամբեր սպասելու եմ ձեր կարգապահ ու պարտաճանաչ ծառայությանը ու վերադարձին։
Ամառային զորակոչը Գեղարքունիքի մարզում առաջիկա օրերին կմեկնարկի նաև Գավառ, Սևան, Վարդենիս, Ճամբարակ համայնքներում և կընթանա մինչև 2023 թվականի հուլիսի 31-ը։