Գեղարքունիքի մարզպետի աշխատակազմ

Գեղարքունիքի մարզի Մարտունի համայնքի Գեղհովիտ գյուղում ՀՀ կառավարության կողմից 2022 թվականին իրականացվող սուբվենցիոն ծրագրերի շրջանակներում ասֆալտապատվել է Սեւան-Մարտունի-Գետափ միջպետական նշանակության ավտոճանապարհից Լեռնահովիտ բնակավայր տանող ճանապարհը եւ արտաքին լուսավորության ցանց է կառուցվել նույն Լեռնահովիտ բնակավայրում եւ Գեղհովիտ գյուղի 1-ին եւ 5-րդ փողոցներում։
 Գեղհովիտ գյուղի Լեռնահովիտ բնակավայր տանող ճանապարհի ասֆալտապատման ծրագրի պայմանագրային արժեքը կազմել է 100 միլիոն դրամ, որի 50 տոկոսը հատկացրել է ՀՀ կառավարությունը, 50 տոկոսը՝ Մարտունու համայնքապետարանը։
Շինարարական աշխատանքները մեկնարկել են 2022 թվականի օգոստոսից եւ ավարտվել նույն տարվա նոյեմբեր ամսին։
Ծրագրի իրականացման արդյունքում ասֆալտապատվել է Սեւան-Մարտունի-Գետափ ավտոճանապարհից Լեռնահովիտ բնակավայր մտնող ճանապարհը՝ 1200 մետր երկարությամբ եւ շուրջ 7200 քառակուսի մետր մակերեսով։
Լեռնահովիտն իր պատմության մեջ առաջին անգամ է մուտքի բարեկարգ ու ասֆալտապատ ճանապարհ ունենում։
Գեղհովիտի արտաքին լուսավորության ցանցի կառուցման ծրագրի պայմանագրային արժեքը կազմել է 49 միլիոն դրամ, որի 60 տոկոսը հատկացրել է ՀՀ կառավարությունը, 40 տոկոսը՝ Մարտունու համայնքապետարանը։ Շինարարական աշխատանքները մեկնարկել են 2022 թվականի սեպտեմբերից եւ ավարտվել նույն թվականի դեկտեմբերին։
Ծրագրի իրականացման արդյունքում Գեղհովիտի 1-ին, 5-րդ փողոցներում եւ Լեռնահովիտ բնակավայրում կառուցվել է արտաքին լուսավորության ցանց՝ շուրջ 9 կիլոմետր երկարությամբ։ Տեղադրվել է ԼԵԴ համակարգով աշխատող 330 լուսատու։
Գեղհովիտի 1-ին, 5-րդ փողոցները եւ Լեռնահովիտ բնակավայրը լուսավորվում են առաջին անգամ։