Գեղարքունիքի մարզպետի աշխատակազմ

Այսօր Գեղարքունիքի մարզպետ Կարեն Սարգսյանը ընդունեց «Պարտաճանաչ զինվոր» խորագրով շարադրության մրցույթի ևս մեկ հաղթող, Հայոց բանակի զինծառայող Գառնիկ Վարդանյանին:
2022 թվականի մայիսի 6-12-ը Գեղարքունիքի մարզային ենթակայության պետական հանրակրթական ուսումնական հաստատությունների 12-րդ դասարանների արական սեռի աշակերտների միջև անցկացված «Պարտաճանաչ զինվոր» խորագրով շարադրության մրցույթում Կարմիրգյուղի թիվ 1 միջնակարգ դպրոցի աշակերտ Գառնիկ Վարդանյանի աշխատանքն արժանացել էր երկրորդ մրցանակի։
Այսօր Հայոց բանակի զինծառայող Գառնիկ Վարդանյանը ևս Պաշտպանության նախարարության կողմից` մարզպետի միջնորդությամբ, որպես «Պարտաճանաչ զինվոր» խորագիրը կրող շարադրության մրցույթի հաղթող, խրախուսվել է հնգօրյա զինվորական արձակուրդով։
***
«Պարտաճանաչ զինվոր»
Ասում են՝ տղան տան սյունն է: Բայց, ոչ՛, տղան առաջին հերթին հայրենիքի սյունն է: Զինվոր դառնալով՝ յուրաքանչյուր տղա դառնում է հայրենիքի հույսն ու հավատը: Ես էլ 12-րդ դասարանում սովորող, սակայն 18 տարիս լրացած քաջ հայորդի եմ: Մի քանի ամսից ես էլ կդառնամ իմ հայրենի հողի պաշտպանը: Քաջ գիտակցում եմ, թե ուր եմ գնում: Գնում եմ իմ զինվոր եղբայրների հետ պաշտպանելու տունս: Թեկուզ կյանքի գնով, բայց հպարտությամբ պատրաստ եմ կռվել ոսոխի դեմ և հետ բերել մեր պապերի արյունով պահված սուրբ հայրենիքը: Տղան արդեն իսկ զինվոր դառնալով՝ պարտաճանաչ է: Քանի որ հրամանատարի տված հրամանը անքննարկելի է և պետք է կատարվի անվերապահորեն: Հիմա կարող եմ անվերջ թվարկել զինվորի հերոս լինելը, քաջ լինելը, բայց ի՞նչ կփոխեմ արդյոք: Ես չեմ կարող հետ վերադարձնել այն քաջերին, որոնք իրենց կյանքը չխնայեցին Արցախյան գոյամարտում: Եվ գիտե՞ք, հիմա էլ վստահ չեմ, թե արդյոք իմ ծառայության ժամանակ ինչեր տեղի կունենան: Մեզնից ոչ ոք երաշխավորված չէ բանակում: Բայց, անշուշտ, յուրաքանչյուր զինվորի տանը սպասում է իր մինուճար մայրը կարոտն աչքերին, հպարտ հայրը կարոտած սրտով, քույրեր, եղբայրներ, և նաև մի գաղտնիք ունի իր սրտում պահած, մի քաղցր գաղտնիք, որի հանդեպ, ավա՜ղ, նա կորցնում է իր պարտաճանաչությունը բանակ գնալիս, քանի որ հնարավորություն չի ունենում նրան տեսնել, երբ սիրտն անսահման սիրով է լցվում:
Քաջ են մեր զինվորները, անսահման քաջ: Ես էլ կդառնամ նրանցից մեկը շուտով և անվերապահորեն ու պարտաճանաչությամբ կպահեմ հայրենիքիս տված խոստումը:
Իմ ուժով կպահեմ հայրենիքս,
Իմ ձեռքով կոչնչացնեմ թշնամուն.
Իմ սրտում պահելով իմ սիրուն,
Կվերադառնամ տուն:
Երդվու՜մ եմ: