Գեղարքունիքի մարզպետի աշխատակազմ

ՀՀ ՏԿԵ նախարարն ու Գեղարքունիքի մարզպետն այցելեցին Մարտունի համայնքում հիմնանանորոգվող ճանապարհների շինարարական տեղամասեր
Հունիսի 24-ին ՀՀ ՏԿԵ նախարար Գնել Սանոսյանը եւ Գեղարքունիքի մարզպետ Կարեն Սարգսյանը Մարտունի համայնքում ծանոթացան Մարտունի-Վարդենիս միջպետական ավտոճանապարհի եւ Մարտունի քաղաքի Սայաթ-Նովա փողոցի հիմնանորոգման աշխատանքներին։
Մարտունի-Վարդենիս միջպետական նշանակության ճանապարհի հիմնանորոգման աշխատանքների մեկնարկը տրվել է 2021 թվականին։ Շինարարության պայմանագրային արժեքը կազմում է 743,5 միլիոն դրամ, որն ամբողջությամբ հատկացվել է պետբյուջեի միջոցներից։ Նախատեսված է հիմնանորոգել 5 կիլոմետր 900 մետր երկարության ճանապարահատված՝ 46 հազար քառակուսի մետր մակերեսով։ 2021 թվականին հիմնանորոգվել է ճանապարհի 1 կիլոմետրանոց հատվածը, որի համար ծախսվել է 195,5 միլիոն դրամ, իսկ մնացած 548 միլիոն դրամը ծախսվում է այս տարվա ընթացքում։ Հիմնանորոգման ծրագրի շրջանակներում հեռացվում է ասֆալտբետոնյա հին շերտը, տեղադրվում նոր հիմք եւ երկշերտ ասֆալտբետոնյա ծածկ, ջրահեռացման ակոսներ։ Կիրականացվեն նաեւ կահավորման եւ գծանշման աշխատանքներ։ Ըստ «Շանթ-Սեյրան» ընկերության տնօրենի՝ 2022 թվականի հունիսի 24-ի դրությամբ շինարարական աշխատանքներն այստեղ ավարտված են մոտ 80 տոկոսով։
Մարտունի քաղաքի Սայաթ-Նովա փողոցում ճանապարհաշինական աշխատանքները մեկնարկել են 2022 թվականի հունիսի 15-ից։ Ճանապարհաշինական ծրագրի պայմանագրային արժեքը կազմում է 530 միլիոն դրամ, որը նույնպես ամբողջությամբ հատկացված է պետբյուջեի միջոցներից։ Սայաթ-Նովա փողոցում նախատեսվում է ճանապարհը հիմնանորոգել 2,5 կիլոմետր երկարությամբ եւ 18 հազար 300 քառակուսի մետր մակերեսով։ Ճանապարհի ողջ երկայնքով կառուցվում է նոր կոյուղագիծ, երկկողմանի սալիկապատվում են մայթերը՝ 3200 քառակուսի մետր ընդհանուր մակերսով։ Ամբողջությամբ ճանապարհից հեռացվում է հին ասֆալտբետոնյա շերտը, փոխարենը տեղադրվում է նոր ասֆալտբետոնյա երկշերտ ծածկ։ Շինարարական աշխատանքները նախատեսված է ավերտել մինչեւ տարեվերջ։
«Սայաթ-Նովա փողոցի հիմնանորոգմամբ մենք ունենում ենք Սեւան-Մարտունի-Գետափ միջպետական նշանակության ավտոճանապարհի այլընտրանքային ճանապարհը, որն անցնում է Մարտուն քաղաքով եւ նկատելիորեն նվազեցնելու է Աբովյան փողոցով անցնող ճանապարհի երթեւեկության ծանրաբեռնվածությունը»,-նշեց ՏԿԵ նախարար Գնել Սանոսյանը։
Նախարարը եւ մարզպետը շինարարների հետ քննարկեցին շինարարության ընթացքում ի հայտ եկած առաջնահերթ խնդիրները, տվեցին համապատասխան ցուցումներ եւ հանձնարարականներ։