Գեղարքունիքի մարզպետի աշխատակազմ

ՀՀ Ազգային ժողովի գավաթի խաղարկությունը նպատակ ունի մատաղ սերնդի շրջանում խթանել ֆիզկուլտուրայի և սպորտի զարգացումը ի նպաստ նրա համակողմանի, ներդաշնակ դաստիարակությանը, դպրոցականների կենցաղում առողջ ապրելակերպի արմատավորումը, խթանելու պետական, տեղական ինքնակառավարման մարմինների և մարզական կազմակերպությունների կողմից ֆիզկուլտուրայի և սպորտի ուղղությամբ իրականացվող համագործակցված աշխատանքներին:
ՀՀ ԱԺ-ի գավաթի խաղարկությանը մասնակցում են Հայաստանի Հանրապետության և Արցախի Հանրապետության հանրակրթական դպրոցների 1-6-րդ դասարանների աշակերտները: Այն անց է կացվում չորս փուլով` 2021-2022 ուսումնական տարվա ընթացքում:
Մրցումների ծրագրում ընդգրկված են վազք 60 մետր` բարձր մեկնարկից, վազք 500 մետր, հեռացատկ թափավազքից, ձգումներ կախ դրությունից` տղաներ, ձեռքերի ծալումներ և ուղղումներ, պառկած հենադրությունից մարզանստարանին` աղջիկներ, թենիսի գնդակի նետում թափավազքից:
Գեղարքունիքի մարզում ՀՀ ԱԺ գավաթի խաղարկության մրցումները մեկնարկել են 2022 թվականի ապրիլ ամսին: Ներդպրոցական մրցում-ստուգատեսների արդյունքում ձևավորվել են դպրոցների թիմերը` 2 տղա, 2 աղջիկ:
Այս փուլին մասնակցել են շուրջ 5500 դպրոցականներ: Ըստ դասարանների՝ ձևավորված թիմերը մայիսի 12-13 մասնակցել են համայնքային փուլին, որոնք կազմակերպվել են Ճամբարակ, Սևան, Գավառ, Մարտունի և Վարդենիս համայնքներում: Համայնքային փուլին մասնակցել են 93 դպրոցների 1-6-րդ դասարանների թիմեր:
Համայնքային փուլում 4-6-րդ դասարանցիների մրցապայքարում հաղթող թիմերը իրենց ուժերն են չափել հունիսի 8-ին Գավառի Պ. Ղանդիլյանի անվան միջնակարգ դպրոցի մարզահրապարակում կայացած մարզային փուլի մրցումներում:
Ծավալվել է հետաքրքիր և անզիջում պայքար, որի արդյունքում 4-րդ դասարանցիների մրցապայքարում հաղթող է ճանաչվել Մարտունու Ս. Դարբինյանի անվան N 2 հիմնական, 5-րդ դասարանցիների մրցապայքարում` Մարտունու Մնաց Մելք-Շահումյանցի անվան N 1 հիմնական, իսկ 6-րդ դասարանցիների մրցապայքարում` Գավառի Պ. Ղանդիլյանի անվան N 2 միջնակարգ դպրոցների թիմերը:
Հաղթող թիմերից ձևավորվել է մարզի հավաքական թիմը, որը մարզը կներկայացնի ՀՀ ԱԺ գավաթի խաղարկության մրցումների հանրապետական փուլում: