Գեղարքունիքի մարզպետի աշխատակազմ

Գեղարքունիքի մարզպետ Կարեն Սարգսյանը խորհրդակցություն անցկացրեց հանրակրթական դպրոցների տնօրենների հետ, որի ընթացքում խոսեց դպրոցներում իրականացվող աշխատանքների և առաջիկա անելիքների մասին:
«Հարգելի տնօրեններ, շուտով ավարտին կմոտենա 2021-2022 ուսումնական տարին, և ես կցանկանամ, որպեսզի դրա հետ կապված բոլոր գործընթացները կազմակերպվեն և իրականացվեն օրենքի պահանջին համապատասխան: Գեղարքունիքի մարզպետարանը պատրաստակամ է` աջակցել ձեզ ի հայտ եկած խնդիրների կարգավորման գործում: Վերջերս Գեղարքունիքի մարզպետարանի և «Հայաստանի ֆիզիկական կուլտուրայի և սպորտի պետական ինստիտուտ» հիմնադրամի միջև կնքվեց համագործակցության հուշագիր, որի շրջանակներում Գեղարքունիքի մարզից ներկայացված դիմորդներին նշված բուհում կտրվեն որոշակի արտոնություններ: Ուստի կխնդրեի, որպեսզի ավարտական դասարանների աշակերտներին իրազեկեք այդ նախաձեռնության մասին, որը գուցեև բերի մեր մարզից տվյալ բուհում դիմորդների թվի ավելացման:
Հորդորում եմ, որպեսզի կոլեկտիվներում ակտիվ քննարկումներ ծավալվեն մանկավարժների կամավոր ատեստավորման վերաբերյալ, որպեսզի նրանց ներգրավվածությունը գործընթացին ավելի ընդգրկուն լինի:
Նաև դպրոցները պետք է ակտիվ ներգրավվածություն ունենան 2022 թվականի ապրիլի 30-ին կայանալիք համապետական շաբաթօրյակի աշխատանքներին և 2022 թվականի մայիսի 14-ին կայանալիք «Վարչապետի գավաթ» խճուղավազք մրցույթին»,- նշեց մարզպետ Կարեն Սարգսյանը:
Հանդիպման ընթացքում Գեղարքունիքի մարզպետը խոսեց նաև հանրակրթական դպրոցներում մանկավարժների անհարկի բացակայությունների և հանցագործության տարր պարունակող երևույթների բացառման, ուսման առանձնահատուկ կարիքներ ունեցող երեխաներին հանրակրթության ոլորտում ներգրավելու, պատվաստումների գործընթացի շարունակական ապահովման, դպրոցական գույքի առկայության և դպրոցամերձ հողամասերի պատկանելության վերաբերյալ տեղեկատվություն ներկայացնելու մասին: