Գեղարքունիքի մարզպետի աշխատակազմ

Գեղարքունիքի մարզի դպրոցական թիմը ՀՀ ԱԺ գավաթի խաղարկության հանրապետական փուլում զբաղեցրել է պատվավոր երկրորդ տեղը։
Հունվարի 18-ին Գեղարքունիքի մարզպետ Կարեն Սարգսյանն ընդունեց հաղթանակ տարած թիմի անդամներին և նրանց ֆիզկուլտուրայի ուսուցիչներին: Վերջիններս և դպրոցականները իրենց տպավորությունները ներկայացրեցին կայացած մրցումների վերաբերյալ:
Գեղարքունիքի մարզպետ Կարեն Սարգսյանը շնորհավորեց թիմին՝ գրանցած հաջողության համար և 2020-2021 ուսումնական տարում ՀՀ Ազգային Ժողովի գավաթի խաղարկության եզրափակիչ փուլում 2-րդ տեղը գրավելու համար պատանի մարզիկներին և նրանց ուսուցիչներին խրախուսեց ՀՀ Գեղարքունիքի մարզպետի շնորհակալագրով: Մարզպետը հորդորեց թիմի անդամներին՝ նպատակ դնել և ավելի լավ մարզվել, որպեսզի հաջորդ մրցաշարում հնարավորություն ունենա ավելի բարձր արդյունք ապահովել:
«Կցանկանամ, որպեսզի դուք բացի ֆիզկուլտուրա առարկայից, մնացած առարկաների ուսումնասիրման ընթացքում ևս գրանցեք հաջողություններ և ձեռք բերեք անսահման գիտելիքներ, որպեսզի տարբեր ոլորտներում բարձր պահեք ձեր դպրոցի, մարզի և մեր երկրի անունն ու պատիվը»,- նշեց մարզպետը:
Կարեն Սարգսյանը խոստացավ հարկ եղած դեպքում աջակություն ցուցաբերել նշված թիմերը ներկայացնող դպրոցներին՝ անհրաժեշտ մարզական գույքի համալրման համար:
Գեղարքունիքի մարզպետարանի ԿՄՍ վարչության տեղեկացմամբ 2021 թվականի մայիս-հունիս ամիսների ընթացքում Գեղարքունիքի մարզում կայացել են ՀՀ ԱԺ գավաթի խաղարկության ներդպրոցական, տարածքային եւ մարզային փուլերը, որոնց մասնակցել են մարզի բոլոր հանրակրթական դպրոցների 1-6-րդ դասարաններում սովորող ավելի քան 4000 դպրոցականներ:
Ներդպրոցական եւ տարածքային փուլերի մրցումներին մասնակցել են 1-6-րդ, իսկ մարզային եւ հանրապետական փուլերի մրցումներին՝ 4-6-րդ դասարանների աշակերտներից ձեւավորված թիմերը:
ՀՀ ԱԺ գավաթի խաղարկության մարզային փուլում հաղթող թիմերից ձեւավորվել է Գեղարքունիքի մարզի հավաքական թիմը, որի կազմում ընդգրկվել են Մարտունու
Մելիք-Շահումյանցի անվան թիվ 1 հիմնական, Գավառի Պ. Ղանդիլյանի անվան թիվ 2 միջնակարգ, Մարտունու Ս. Դարբինյանի անվան թիվ 2 հիմնական դպրոցների թիմերը:
Հավաքական թիմում հանդես են եկել 12 դպրոցականներ, 3 մարզիչներ եւ Գեղարքունիքի մարզպետարանի ԿՄՍ վարչության 1 ներկայացուցիչ:
2021 թվականի դեկտեմբերի 24-25-ը Վանաձոր քաղաքում կայացել է 2020-21 ուսումնական տարվա ՀՀ Ազգային ժողովի գավաթի խաղարկության եզրափակիչ փուլը, որի ընթացքում Գեղարքունիքի մարզի հավաքական թիմը զբաղեցրել է 2-րդ պատվավոր տեղը:
Մրցապայքարն ընթացել է 6 մարզաձեւերից, որոնք են՝ վազք՝ 500 մետր, վազք՝ 60 մետր, թենիսի գնդակի նետում, հեռացատկ թափավազքով, ձգումներ կախ վիճակից և փոխանցումավազք:
Գեղարքունիքի մարզի հավաքական թիմի անդամները խրախուսվել են գավաթներով, մեդալներով, պատվոգրերով եւ շնորհակալագրերով: