Գեղարքունիքի մարզպետի աշխատակազմ

ՀՀ արտակարգ իրավիճակների նախարարության փրկարար ծառայության Գեղարքունիքի մարզային փրկարարական վարչության պետի 2021 թվականի օգոստոսի 6-ի համապատասխան գրության համաձայն՝ Գեղարքունիքի մարզպետարանում, մարզպետի համապատասխան որոշմամբ, ստեղծվել է Գեղարքունիքի մարզի անտառային և բուսածածկ տարածքներում հրդեհների առաջացման ու տարածման վտանգի կանխարգելման, դրանց հետևանքով բնակչությանն ու բնությանը հասցվող վնասների ռիսկի նվազեցմանն ուղղված աշխատանքային խումբ:
Օգոստոսի 17-ին Գեղարքունիքի մարզպետարանում տեղի ունեցավ նշված աշխատանքային խմբի առաջին նիստը, որը վարում էր աշխատանքային խմբի ղեկավար, Գեղարքունիքի մարզպետի տեղակալ Ռուբիկ Նավոյանը:
Աշխատանքային խմբի կազմում ընդգրկված են Գեղարքունիքի մարզպետարանի գյուղատնտեսության և բնապահպանության, մարզպետարանի ՏԻՄ վարչությունների, ՀՀ ԱԻՆ ՓԾ Գեղարքունիքի մարզային փրկարարական վարչության, «Սևան» ազգային պարկի, ՀՀ ոստիկանության Գեղարքունիքի մարզային վարչության, «Հայանտառ» ՊՈԱԿ-ի «Ճամբարակի անտառտնտեսություն» մասնաճյուղի, ՀՀ քաղաքաշինության տեխնիկական և հրդեհային անվտանգության տեսչական մարմնի Գեղարքունիքի տարածքային բաժնի ղեկավարներ և պատասխանատու աշխատողներ:
Նիստի ընթացքում աշխատանքային խումբը քննարկեց մի շարք թեմաներ, որոնք առնչվում էին բարձր ջեմային ռեժիմով պայմանավորված մարզի մի շարք հատվածներում հակահրդեհային կանոնների պահպանության, այդ ուղղությամբ իրականացվող տարաբնույթ միջոցառումների իրականացմանը: Խոսվեց Գեղարքունիքի մարզի անտառային և բուսածածկ տարածքներում հակահրդեհային նշանակության ճանապարհիների հարթեցման, անջրպետների կառուցման, ջրաղբյուրների, հիդրանտների հիմնման, ջրային ցանցերում ըստ անհրաժեշտության ջրի ապահովման, գործնական միջոցառումների պլանավորման և իրականացման մասին։ Շեշտվեց, որ այս ամենին հասնելու համար հարկավոր է փոխհամագործակցված աշխատանք տանել համայնքների ղեկավարների, շահագրգիռ կառույցների ու բնակչության հետ:
Աշխատանքային խմբի ղեկավար, Գեղարքունիքի մարզպետի տեղակալ Ռուբիկ Նավոյանն առաջարկեց խմբի անդամներին՝ նշված միջոցառումների իրականացման, իրավիճակը վերահսկողության տակ պահելու նպատակով հրդեհավտանգ վայրերում կատարել ամենօրյա շրջայցեր և պարբերաբար զեկուցել առկա իրավիճակի մասին, իսկ հավաքված խնդիրները երկշաբաթյա պարբերականությամբ քննարկել աշխատանքային խմբի հերթական նիստի ընթացքում: