Գեղարքունիքի մարզպետի աշխատակազմ

Գեղարքունիքի մարզի բնակչության շրջանում շարունակվում են կորոնավիրուսի դեմ պատվաստումների աշխատանքները:

ՀՀ առողջապահության նախարարության հաղորդած տվյալներով հանրապետությունում պատվաստվողների քանակով առաջատարը Գեղարքունիքի մարզն է:

Մայիսի 21-ին Հայաստանի Հանրապետությունում կորոնավիրուսային հիվանդության դեմ պատվաստումների աշխատանքների կազմակերպման և իրականացման գործընթացը կանոնակարգող հանձնաժողովների հերթական առցանց նիստի ընթացքում մարզում պատվաստումների ընթացքի մասին զեկուցեց Գեղարքունիքի մարզպետարանի առողջապահության և սոցիալական ապահովության վարչության պետ Լուսինե Վարդանյանը:

Ըստ զեկուցողի, մայիսի 21-ի դրությամբ Գեղարքունիքի մարզում պատվաստվել է 2227 քաղաքացի:

1320 քաղաքացի պատվաստվել է «Աստրազենեկա», 803 քաղաքացի՝ «Սպուտնիկ ՎԻ 1», 83 քաղաքացի՝ «Սպուտնիկ ՎԻ 2» և 21 քաղաքացի՝ «Կորոնավակ» պատվաստանյութով:

Առողջապահության և սոցիալական ապահովության վարչության պետը նշեց նաև, որ առ այսօր մարզային ենթակայության կրթական հաստատություններից պատվաստվել է 198 աշխատող:

Մարզի առողջապահական հիմնարկներից՝ «Աստրազենեկա» պատվաստանյութով պատվաստվել է 104, «Սպուտնիկ ՎԻ 1» պատվաստանյութով՝ 151, իսկ «Սպուտնիկ ՎԻ 2» պատվաստանյութով՝ 38 բուժաշխատող: