Գեղարքունիքի մարզպետի աշխատակազմ

Ապրիլի 7-ին Գեղարքունիքի մարզպետ Գնել Սանոսյանն ընդունեց Գեղարքունիքի մարզային ենթակայության հանրակրթական ուսումնական հաստատություններից ներկայացրած տարբեր մասնագիտություն ունեցող 13 մանկավարժների, ովքեր, լավագույն, երկարամյա և անբասիր աշխատանքի համար 2020 և 2021 թվականներին խրախուսվել են ՀՀ ԿԳՄՍ նախարարի շնորհակալագրերով:
Մարզպետը ողջունեց նրանց, շնորհավորեց նաև մայրության և գեղեցկության տոնի առթիվ, մաղթելով նրանց նորանոր հաջողություններ ու ձեռքբերումներ:
«Ընդունեք իմ երախտագիտությունը՝ ձեր անձնվեր աշխատանքի համար: Կարծում եմ, որ այս շնորհակալագրերն ավելի կպարտավորեցնեն ձեզ՝ խելացի ու բանիմաց սերունդներ կրթելու ու դաստիարակելու հարցում: Ձեր նման էլի շատ մանկավարժներ իրենց ազնիվ աշխատանքով արժանի են գովեստի ու խրախուսանքի: Անգնահատելի է ուսուցչի աշխատանքը, այն մեծ դեր ունի նաև հասարակության զարգացման գործում: Մեծ է նաև ձեր դերը հետպատերազմյան ժամանակահատվածում ծագած խնդիրների կարգավորման, մեր հայրենիքի շենացման ու հզորացման գործում: Դուք պետք է նորովի նայեք ձեր աշխատանքին, նոր ջանք ու եռանդ ներդնեք, լինենք ավելի ակտիվ ու նախաձեռնող»,- նշեց Գնել Սանոսյանը:
Այնուհետև Գեղարքունիքի մարզպետը ՀՀ ԿԳՄՍ նախարարի 2021 թվականի մարտի 29-ի համապատասխան հրամանով նախատեսված շնորհակալագրերը հանձնեց Գավառի Հ. Թումանյանի անվան թիվ 3 հիմնական դպրոցի դասվար Արշալույս Ամիրխանյանին, Գանձակի թիվ 1 միջնակարգ դպրոցի մաթեմատիկայի ուսուցչուհի Արևիկ Սիմոնյանին, Սարուխանի Մ. Մակարյանի անվան թիվ 1 միջնակարգ դպրոցի պատմության, հասարակագիտության ուսուցչուհի Ռուզաննա Աբրահամյանին, Փամբակ-Դարանակ միջնակարգ դպրոցի ռուսաց լեզվի ուսուցչուհի Կարինե Ղազարյանին, Արծվանիստի միջնակարգ դպրոցի ռուսաց լեզվի ուսուցչուհի Լյուդմիլա Եղիազարյանին, Երանոսի թիվ 1 միջնակարգ դպրոցի մաթեմատիկայի ուսուցչուհի Նոյեմզար Արզումանյանին, Ծակքարի միջնակարգ դպրոցի մաթեմատիկայի ուսուցչուհի Սիլվարդ Հովհաննիսյանին, Ներքին Գետաշենի Ա. Եղիազարյանի անվան թիվ 2 միջնակարգ դպրոցի դասվար Անահիտ Մկրտչյանին, Սևանի Վ. Կարապետյանի անվան թիվ 3 հիմնական դպրոցի կենսաբանության և բնագիտության ուսուցչուհի Ռուզաննա Ղուկասյանին և Ճամբարակի թիվ 1 հիմնական դպրոցի հայոց պատմության և հասարակագիտության ուսուցչուհի Կարինե Գաբրիելյանին:
ՀՀ Գեղարքունիքի մարզպետ Գնել Սանոսյանը երկարամյա և անբասիր աշխատանքի համար ՀՀ Գեղարքունիքի մարզպետի շնորհակալագրով միաժամանակ խրախուսեց 2020 թվականին ՀՀ ԿԳՄՍ նախարարի շնորհակալագրին արժանացած մանկավարժներ, Կարմիրգյուղի թիվ 1 միջնակարգ դպրոցի տնօրենի տեղակալ Հասմիկ Ումրշատյանին, Գեղարքունիք գյուղի միջնակարգ դպրոցի ֆիզիկայի ուսուցչուհի Նելի Դռնոյանին և Շողակաթի միջնակարգ դպրոցի պատմության ուսուցչուհի Սյուզաննա Հովսեփյանին:
Խրախուսանքի արժանացած մանկավարժներն իրենց երախտագիտությունն հայտնեցին Գեղարքունիքի մարզպետ Գնել Սանոսյանին, իրենց հերթին նշելով, որ այդ պարգևներն աշխատանքում ավելի պարտավորեցնող են: