Գեղարքունիքի մարզպետի աշխատակազմ

Փետրվարի 8-ին Գեղարքունիքի մարզպետ Գնել Սանոսյանը մարզպետարանի ստորաբաժանումների ղեկավարների մասնակցությամբ անցկացրեց աշխատանքային խորհրդակցություն, որին մասնակցում էին մարզպետի տեղակալը, խորհրդականները, օգնականը,մարզպետարանի գլխավոր քարտուղարը և գլխավոր քարտուղարի  տեղակալը: Հանդիպման առանցքային թեմաներն առնչվում էին զոհված, վիրավորում ստացած և անհետ կորած զինծառայողների ընտանիքների հանդեպ ցուցաբերվող հատուկ վերաբերմունքին և ուշադրությանը, ինչպես նաև մարզպետարանի ստորաբաժանումների աշխատակիցների կողմից մարզպետին ներկայացվող աշխատանքային անհատական հաշվետվություններին: «Մարզպետարանի աշխատակիցները, մարզի համայնքների, մարզային ենթակայության առողջապահական և կրթական հաստատությունների ղեկավարները պետք է հաճախակի այցելեն զոհված, վիրավոր և անհետ կորած զինծառայողների ընտանիքներ, ծանոթանան նրանց խնդիրներին և դրանց վերաբերյալ տեղեկատվություն ներկայացնեն մարզպետարան՝ համապատասխան աջակցություն ցուցաբերելու նպատակով: Պետք է լուրջ ուշադրություն դարձնել վիրավոր զինծառայողների առողջական խնդիրներին, գնահատել նրանց կարիքները և օժանդակել ցանկացած խնդրում: Կարևոր եմ համարում նաև պատերազմում զոհված զինծառայողների ծննդյան օրերին այցելություններ կատարել նրանց շիրիմներին, իսկ դպրոցներում կազմակերպել նրանց նվիրված ոգեկոչման արարողություններ»,- նշեց Գնել Սանոսյանը:
Խորհրդակցության ընթացքում մարզպետն անդրադարձավ մի շարք հարցերի, մասնավորապես մարզպետարանում աշխատանքային կարգապահությանը, էլեկտրոնային փաստաթղթաշրջանառությանը, պաշտոնական գրությունների ժամկետների պահպանմանը, սոցիալական աջակցության տարածքային գործակալությունների աշխատանքին, գյուղատնտեսական և քաղաքաշինական ոլորտներում առկա և առաջնահերթ խնդիրների կարգավորմանը:
«Մենք ապրում ենք հետպատերազմական դժվարին ժամանակաշրջան, ինչը մեզանից պահանջում է նոր մոտեցում ցուցաբերել աշխատանքի նկատմամբ և անել հնարավորը՝ ստեղծված իրավիճակից արդյունավետորեն դուրս գալու համար»,- հանդիպումը եզրափակեց մարզպետ Գնել Սանոսյանը :