Գեղարքունիքի մարզպետի աշխատակազմ

ՀՀ կառավարության կողմից հաստատված 2020 թվականի սուբվենցիոն ծրագրերի շրջանակներում սեպտեմբերի ամսից Գեղարքունիքի մարզի Կարմիրգյուղ համայնքում մեկնարկել են Սերգո Ավետիսյան փողոցի շուրջ 2715 քմ և Հովհաննես Շիրազ փողոցի շուրջ 3650 քմ հատվածների ասֆալտապատման աշխատանքները: Ծրագրի պայմանագրային արժեքը մոտ 52 միլիոն 800 հազար դրամ է, որի 60 տոկոսը կամ 31 միլիոն 680 հազար դրամը տրամադրվել է ՀՀ պետական, իսկ 40 տոկոսը կամ 21 միլիոն 120 հազար դրամը՝ Կարմիրգյուղի համայնքային բյուջեից: Մինչև ասֆալտապատումը «ՖԱՎՈՐԻՏ–Մ» ՍՊԸ շինարարական կազմակերպության կողմից նշված փողոցներում իրականացվել են ջրատար կիսախողովակների տեղադրման աշխատանքներ: Ծրագիրը շարունակել է «Գավառի ՃՇՇ» ԲԲԸ կապալառու կազմակերպությունը, որի կողմից նշված փողոցներում կատարվել են հողային աշխատանքներ, կառուցվել է խճային հիմք, տեղադրվել են բազալտե եզրաքարեր, ապա ասֆալտապատում: Ծրագիրը նախատեսված է ավարտին հասցնել մինչև դեկտեմբերի 16-ը, սակայն, շինարարական կազմակերպության պատասխանատուի հավաստմամբ, արդեն ամբողջությամբ ավարտին է հասցվել Սերգո Ավետիսյան փողոցի ասֆալտապատումը, իսկ Հովհաննես Շիրազի անվան փողոցում աշխատանքները կավարտվեն մինչև հոկտեմբերի վերջ: