Գեղարքունիքի մարզպետի աշխատակազմ

Գեղարքունիքի մարզի Ակունք համայնքում ՀՀ կառավարության կողմից իրականացվող սուբվենցիոն ծրագրերի շրջանակներում այս տարի կասֆալտապատվի երկու փողոցների առանձին հատվածներ, կհիմնվի արարողությունների սրահ եւ կբարեկարգվի մշակույթի տան բակի պուրակը: Գեղարքունիքի մարզպետարանի զարգացման ծրագրերի, զբոսաշրջության եւ վերլուծության բաժնի տվյալներով՝ Ակունքի Բարեկամություն եւ Շահումյան փողոցների հատվածների ասֆալտապատման ծրագրի նախնական ընդհանուր արժեքը կազմում է 13 միլիոն 159 հազար դրամ, որի 60 տոկոսը կամ 7 միլիոն 895 հազար դրամը հատկացնում է ՀՀ կառավարությունը, 5 միլիոն 263 հազար դրամը՝ Ակունքի համայնքապետարանը: Ակունքի մշակույթի տան բակի պուրակի բարեկարգման ծրագրի նախնական ընդհանուր արժեքը կազմում է 12 միլիոն 736 հազար դրամ, որի 45 տոկոսը կամ 5 միլիոն 731 հազար դրամը հատկացնում է ՀՀ կառավարությունը, 55 տոկոսը կամ 7 միլիոն դրամը՝ Ակունքի համայնքապետարանը: Ակունքի արարողությունների սրահի հիմնման ծրագրի ընդհանուր արժեքը կազմում է 9 միլիոն 300 հազար դրամ, որի 45 տոկոսը կամ 4 միլիոն 185 հազար դրամը հատկացնում է ՀՀ կառավարությունը, 55 տոկոսը կամ 5 միլիոն 115 հազար դրամը՝ Ակունքի համայնքապետարանը: Շինարարական աշխատանքների մրցույթը կհայտարարվի առաջիկայում: Ակունքի համայնքապետարանի աշխատակազմից ստացված տեղեկատվության համաձայն՝ Բարեկամություն փողոցի մի հատվածը կասֆալտապատվի 246, Շահումյան փողոցի մի հատվածը՝ 120 գծամետր երկարությամբ: Մշակույթի տան բակի պուրակում կտեղադրվեն եզրաքարեր եւ հուշաքարեր, նստարաններ, կկատարվի սալիկապատում:Արարողությունների սրահը կհիմնվի մշակույթի տան շենքի տարածքում, որտեղ հատկացված գումարի շրջանակներում նախատեսվում է իրականացնել ներքին հարդարման եւ վերակառուցման աշխատանքներ: