Գեղարքունիքի մարզպետի աշխատակազմ

Այս տարվա ընթացքում Գավառ քաղաքի Հացառատ եւ Արծվաքար թաղամասերում կկառուցվեն տարեցների համար խաղարաններ, կբարեկարգվեն Սուրբ Աստվածածին թեմական առաջնորդանիստ եկեղեցու եւ նրան հարակից տարածքների զբոսայգիները: Այդ աշխատանքները կկատարվեն ՀՀ կառավարության կողմից իրականացվող սուբվենցիոն ծրագրերի շրջանակներում: Ինչպես տեղեկացրեցին Գեղարքունիքի մարզպետարանի զարգացման ծրագրերի, զբոսաշրջության եւ վերլուծության բաժնից, ծրագրի նախնական ընդհանուր արժեքը կազմում է մոտ 32 միլիոն 848 հազար դրամ, որի 45 տոկոսը կամ 14 միլիոն 781 հազար դրամը հատկացնում է ՀՀ կառավարությունը, 55 տոկոսը կամ 18 միլիոն 66 հազար դրամը՝ Գավառի համայնքապետարանը: Գավառի քաղաքապետարանի աշխատակազմից ստացված տեղեկատվության համաձայն՝ շինարարական աշխատանքների մրցույթն արդեն հայտարարված է: «Այս ծրագրի իրականացման արդյունքում ժամանակակից տեսքի կբերվի Գավառի Սուրբ Աստվածածին եկեղեցու, Քավառ քաղաքի անձնագիր-հուշարձանի, Հայոց ցեղասպանության զոհերի Արցախյան ազատամարտի զոհերի հուշարձանների տարածքները: Կկատարվի գազոնների կանաչապատում, ծառատնկում, եզրաքարերի տեղադրում, իսկ Արծվաքար եւ Հացառատ թաղամասերում կկառուցվեն խաղարաններ, որոնք կլուծեն տարեցների ժամանցի խնդիրը: Շինարարական աշխատանքները կավարտվեն այս տարվա ընթացքում»,-ներկայացրին Գավառի քաղաքապետարանից:
Սուբվենցիոն հաջորդ ծրագրերով Գավառ քաղաքում կտեղադրվեն վեց կանգառներ և կհմնանորոգվի մշակույթի պալատի մի հատվածը, որոնց համար նախատեսված գումարը , ըստ Գեղարքունիքի մարզպետարանի զարգացման ծրագրերի, զբոսաշրջության եւ վերլուծության բաժնից փոխանցված տվյալների, կազմում է մոտ 32 միլիոն 400 հազար դրամ, որի 45 տոկոսը կամ 14 միլիոն 580 հազար դրամը հատկացնում է ՀՀ կառավարությունը, 55 տոկոսը կամ 17 միլիոն 820 հազար դրամը՝ Գավառի համայնքապետարանը: Գավառի քաղաքապետարանի աշխատակազմից ստացված տեղեկատվության համաձայն՝ շինարարական աշխատանքների մրցույթն արդեն հայտարարված է: Կանգառները կտեղադրվեն Գավառի կենտրոնական փողոցում, Արծվաքար եւ Հացառատ թաղամասերում: Շինարարական աշխատանքները կավարտվեն այս տարվա ընթացքում:Սուբվենցիոն մեկ այլ ծրագրով կհիմնանորոգվի Գավառ քաղաքի մշակույթի տան մի հատվածը, որի ծրագրային ընդհանուր արժեքը կազմում է շուրջ 38 միլիոն 111 հազար դրամ: Գումարի 45 տոկոսը կամ 17 միլիոն 15 հազար դրամը հատկացնում է ՀՀ կառավարությունը, 55 տոկոսը կամ 20 միլիոն 961 հազար դրամը՝ Գավառի համայնքապետարանը: Գավառի համայնքապետարանից ստացված տեղեկատվության համաձայն՝ ծրագրի իրականացման արդյունքում կփոփոխվի եւ կվերակառուցվի մշակույթի տան շենքի դիմային հատվածը, կհիմնանորոգվեն հանդերձարանները, սանհանգույցները եւ շենքի ձախակողմյան հատվածը: Շինարարական աշխատանքների մրցույթը հայտարարված է: