Գեղարքունիքի մարզպետի աշխատակազմ

Գեղհովիտ համայնքում այս տարվա ընթացքում ՀՀ կառավարության կողմից իրականացվող սուբվենցիոն ծրագրերի շրջանակներում կկառուցվի ոռոգման ջրատար, որը կսպասարկի շուրջ 150 տնտեսությունների: Ինչպես տեղեկացրեցին Գեղարքունիքի մարզպետարանի զարգացման ծրագրերի, զբոսաշրջության եւ վերլուծության բաժնից, ծրագրի ընդհանուր արժեքը կազմել է 38 միլիոն 787 հազար դրամ, որի 70 տոկոսը կամ 27 միլիոն 151 հազար դրամը հատկացնում է ՀՀ կառավարությունը, 11 միլիոն 636 հազար դրամը՝ Գեղհովիտի համայնքապետարանը: Գեղհովիտ համայնքի ղեկավարի տեղեկացմամբ՝ ջրատարը կառուցվում է երկաթյա կիսախողովակներով, շուրջ 1900 մետր երկարությամբ: Այն սպասարկելու է «Չայիրներ» կոչվող թաղամասի, 14-րդ փողոցի եւ 5-րդ փողոցի 10-րդ նրբանցքի տնտեսություններին: «Նշված թաղամասերում ոռոգումն իրականացվել է հողաշեն առուներով: Ջուրը մատակարարվել է մեծ կորուստներով, ինչի հետեւանքով հաճախակի ճահճացել են առուներին կից տնամերձերը: Ծրագրի ավարտից հետո, որը նախատեսված է առաջիկա երեք ամսվա ընթացքում, տնտեսություններին ջուրը կմատակարարվի առանց կորուստների:Շինարարական մրցույթը կայացած է, հայտնի է հաղթող կազմակերպությունը, որի հետ շինարարական աշխատանքների իրականացման պայմանագիրը կստորագրվի առաջիկա շաբաթվա ընթացքում»,-ներկայացրեց համայնքի ղեկավարը: