Գեղարքունիքի մարզպետի աշխատակազմ

Գեղամասար համայնքի Նորաբակ բնակավայրի միջնակարգ դպրոցի շենքն արդեն պետական միջոցների հատկացման շնորհիվ ունի նորակառույց տանիք: Ինչպես տեղեկացրեց Նորաբակի միջնակարգ դպրոցի տնօրեն Ժիրայր Մկրտչյանը, դպրոցի տանիքը հրդեհվել էր նախորդ տարվա նոյեմբերի 27-ի գիշերվա ընթացքում: Չնայած փրկարարների գործադրած ջանքներին՝ տանիքն այրվել էր գրեթե ամբողջությամբ՝ շուրջ 570 քառակուսի մետր մակերեսով: Անմիջապես դեպքի վայր էր ժամանել Գեղարքունիքի մարզպետ Գնել Սանոսյանը եւ անհրաժեշտ միջոցառումներ ձեռնարկելու համար դիմել ՀՀ կառավարություն: «ՀՀ կառավարության կողմից հատկացվեց 13, 5 միլիոն դրամ, իսկ շինարարը մրցույթը շահեց 10 միլիոն 750 հազար դրամով: Շինարարական աշխատանքները մեկնարկեցին այս տարվա մարտի սկզբներից եւ պետք է ավարտվեն մայիսի սկզբին՝ երկամսյա ժամկետում: Ապրիլի 13 -ի դրությամբ արդեն ամբողջովին տեղադրված է փայտյա ծածկը եւ թիթեղյա տանիքը, տեղադրված են 12 ջրհորդաններ, մետաղյա եզրային ճաղավանդակներ: Շինարարներին մնացել է հակահրդեհային եւ հականեխիչ նյութերով մշակել տանիքի ծածկի փայտյա մասը, մի քանի աննշան գործեր հասցնել ավարտի: Հրդեհից առաջ ևս մենք ունեինք շենքի տանիքի ոչ բարվոք պատկեր: Դեռ խորհրդային տարիներից ժառանգած շիֆերյա ծածկով տանիքից կաթոցներ կային բազմաթիվ տեղերից, որոնք վերացնելու համար շատ ջանքեր էին պահանջվում,իսկ մեր միջոցները չէին բավարարում: Հիմա արդեն կաշխատենք միանգամայն նորացված ու բարվոք պայմաններում: Դպրոցի մանկավարժական կոլեկտիվը, աշակերտները եւ ծնողները իրենց երախտագիտությունն են հայտնում ՀՀ կառավարությանը եւ անձամբ՝ մարզպետ Գնել Սանոսյանին, ում արագ արձագանքման և հետեւողականության շնորհիվ առաջին անգամ մեր դպրոցը նման կարեւոր ձեռքբերում ունեցավ»,-ներկայացրեց դպրոցի տնօրենը: