Նորություններ
Ներկայացվեց ՀՀ ԱԻՆ Գեղարքունիքի մարզային փրկարարական վարչության տարեկան աշխատանքային հաշվետվությունը
24.01.2020
Գեղարքունիքի մարզպետարանի նիստերի դահլիճում լսվեց ՀՀ ԱԻՆ փրկարար ծառայության Գեղարքունիքի մարզային փրկարարական վարչության 2019 թվականի տարեկան աշխատանքային հաշվետվությունը: Հաշվետվությունն ընդունեցին Գեղարքունիքի մարզպետ Գնել Սանոսյանը եւ ՀՀ ԱԻՆ նախարարի տեղակալ Արկադի Բալյանը: Ներկա էին Գեղարքունիքի մարզի ուժային կառույցների, համայնքների, մարզպետարանի ստորաբաժանումների ղեկավարներ, մարզի փրկարար ծառայության աշխատակիցներ: Հաշվետու զեկուցումից առաջ մարզպետ Գնել Սանոսյանը շնորհակալություն հայտնեց մարզի փրկարար ծառայությանը՝ ինչպես գրանցված ձեռքբերումների, այնպես էլ՝ մարզպետարանի,մարզի համայնքների եւ մարզի ուժային կառույցների հետ համագործակցված աշխատանք կատարելու համար: Ըստ զեկուցման՝ 2019թվականի ընթացքում Գեղարքունիքի մարզում գրանցվել է 553 արտակարգ դեպք, որոնց հետեւանքով զոհվել է 22, մարմնական վնասվածքներ ստացել 86 մարդ: 2018թվականի նույն ժամնակահատվածի համեմատ արտակարգ դեպքերն աճել են 17-ով: Գրանցված դեպքերից 360-ը տեխնածին են, որոնց հետեւանքով զոհվել է 14, վիրավորվել` 60 մարդ: 2018թվականի նույն ժամանակահատվածի համեմատ տեխնածին բնույթի արտակարգ դեպքերն աճել են 37-ով: Աղետներից 21-ը տարերային են, որոնց հետեւանքով զոհ և վիրավոր չկա: Աղետներից 172-ը կենցաղային են, որոնց հետեւանքով զոհվել են 6 եւ վիրավորվել 4 մարդ:
Հաշվետու ժամանակաշրջանում ՀՀ ԱԻՆ ՓԾ Գեղարքունիքի մարզային փրկարարական վարչության ճգնաժամային կառավարման կենտրոնում ստացվել է 653 ահազանգ, որոնցից 100-ը փոխանցվել է այլ շահագրգիռ մարմինների, իսկ մարզային փրկարարական վարչության եւ ստորաբաժանումների կողմից արտակարգ դեպքերի հետեւանքների վերացման համար իրականացվել է 553 ելք:
Անցկացվել է մի շարք հրամանատարաշտաբային ուսումնավարժություններ տարբեր թեմաներով , իրականացվել կանխարգելիչ բնույթի, ինչպես նաեւ բնակչության եւ քաղաքացիական պաշտպանության համակարգերի նախապատրաստմանն ուղղված միջոցառումներ, բարձրացվել է փրկարարական ուժերի պատրաստականությունը, Շողակաթ համայնքի Արտանիշ բնակավայրում հիմնվել է կամավորական հրշեջ-փրկարարական հենակետ, ՄՓՎ հատուկ ջրափրկարարական եւ հրշեջ-փրկարարական ջոկատներն անցկացրել են 28 հատուկ տակտիկական ուսումնավարժություն եւ 288 տակտիկական պարապմունքներ: Գեղարքունիքի ՄՓՎ Սեւանի թիվ 30 ՀՋՋ-ի կողմից տարվել են աշխատանքներ՝ լողասեզոնի ընթացքում բնակչության անվտանգության ապահովման ուղղությամբ: Գեղարքունիքի ՄՓՎ 6 ծառայողներ վերապատրաստվել են ՌԴ ԱԻՆ բարձրագույն ուսումնական հաստատություններում:Կատարելագործվել է կապի ազդարարման համակարգը, իրավական, օրենսդրական եւ նյութատեխնիկական բազան: Գեղարքունիքի մարզպետն ընդունել է արտակարգ իրավիճակներոմ բնակչության պաշտպանության եւ քաղաքացիական պաշտպանության ոլորտին վերաբերող 6 որոշում:
ՀՀ ԱԻՆ փրկարար ծառայության Գեղարքունիքի մարզային վարչության պետ Գեւորգ Գալստյանը համակարգում ներկայացրեց երեք հիմնախնդիր, որոնց կարգավորումը համարվում է առաջնահերթ: «Հիմնախնդիրներից առաջինը կապված է համայնքների ջրատար ցանցերի վրա հրդեհաշիջման հատուկ կետեր տեղադրելու հետ: Հաշվի առնելով այն հանգամանքը, որ մարզում մեծածավալ սուբվենցիոն ծրագրեր են իրականացվում խնդրում եմ նոր ծրագրերի իրականացման դեպքում նախագծերում հաշվի առնել այս առաջարկությունը: Երկրորդ խնդիրը կապված է մարզում, հատկապես սահմանամերձ համայնքներում, անվտանգ ապաստարաններ եւ թաքստոցներ ունենալու հետ: Երրորդ խնդիրը վերաբերում է լողասեզոնի ժամանակ Սեւանա լճում շահագործվող լողամիջոցներին, որոնք մասնավոր անձինք օգտագործում են առանց համապատասխան թույլտվության եւ գրանցման»,-ներկայացրեց վարչության պետը:
Անդրադառնալով բարձրացված հարցերին՝ մարզպետ Գնել Սանոսյանը շեշտեց, որ համագործակցությունը պետք է ընթանա պետական կառավարման բոլոր օղակներում, որպեսզի արդյունավետորեն ու ժամանակին կարգավորվի ամեն մի խնդիր: «Մենք այս տարի սուբվենցիոն եւ այլ ծրագրերով շարունակելու ենք ոռոգման եւ խմելու ջրամատակարարման համակարգերի կառուցման կամ նորացման աշխատանքները: Կարծում եմ, որ մշտապես համագործակցված աշխատելու դեպքում նման կարգի խնդիրներ չեն առաջանա, իսկ մենք անպայման հաշվի կառնենք ներկայացված առաջարկությունները»,-նշեց մարզպետ Գնել Սանոսյանը:
Հաշվետու զեկուցման շուրջ հանդիպման մասնակիցների հետ տպավորություններով կիսվեց ՀՀ ԱԻ նախարարի տեղակալ Արկադի Բալյանը: «Վարչությունն աշխատանքային տարին ամփոփում է լավ արդյունքներով ու նկատելի ձեռքբերումներով: Հուսով եմ , որ հերթական աշխատանքային տարին եւս կլինի կառուցողական, մենք մարզպետարանի, մարզի համայնքների եւ ուժային կառույցների հետ համատեղ աշխատանքի արդյունքում ավելի կկատարելագործենք համակարգը՝ բարձրացնելով մեր քաղաքացիների անվտանգության աստիճանը, ժամանակին արձագանքելով բոլոր արտարգ դեպքերին»,-նշեց նախարարի տեղակալը:
Ծառայողական պարտականությունները լավագույնս կատարելու համար ՀՀ Գեղարքունիքի մարզպետի շնորհակալագրով պարգեւատրվեցին ՀՀ ԱԻՆ փրկարար ծառայության Գեղարքունիքի մարզային փրկարարական վարչության 23 աշխատակից: ՀՀ ԱԻ նախարարի շնորհակալագրով պարգեւատրվեցին Գեղարքունիքի մարզպետարանի ստորաբաժանումների, մարզի ուժային կառույցների ղեկավարներ, մարզային փրկարարական վարչության աշխատակիցներ: