Նորություններ
Գեղարքունիքի մարզպետը Բուժաշխատողի օրվա առթիվ աշխատանքային այց կատարեց մի շարք բուժհաստատություններ
22.06.2019
Գեղարքունիքի մարզպետ Գնել Սանոսյանն այցելեց մարզի մի շարք բուժհաստատություններ՝ բուժաշխատողներին անձամբ շնորհավորելու մասնագիտական տոնի առթիվ: Մարզպետը եղավ Վարդենիսի հիվանդանոցում, Մարտունու ծննդատանը, Մարտունու եւ Գավառի բժշկական կենտրոններում: Գնել Սանոսյանը շրջայց կատարեց բաժանմունքներում ու հիվանդասենյակներում, զրուցեց բուժանձնակազմերի հետ, ծանոթացավ առկա հիմնախնդիրներին ու առաջնահերթ անելիքներին, կատարված աշխատանքներին: Խոսելով նկատված դրական տեղաշարժերի մասին՝ մարզպետը միաժամանակ հորդորեց բուժհաստատությունների տնօրեններին ու բուժաշխատողներին՝ ավելի բարձրացնել աշխատանքային պատասխանատվությունը, սպասարկման որակը, խորացնել մասնագիտական գիտելիքները, քաղաքացիների հանդեպ ցուցաբերել բարեհամբույր վերաբերմունք: «Շատ կարեւոր է, որ դուք ամենաբարյացակամ վերաբերմունք ցուցաբերեք ձեզ դիմած քաղաքացիների հանդեպ, հաշվի առնելով, որ նրանք շատ դեպքերում գտնվում են հոգեբանական ծանր իրավիճակներում: Ձեր կողմից ցուցաբերվող ամեն մի ջերմ վերաբերմունքը այցելուի մոտ միանշանակ կարող է փոխել իրավիճակը: Միշտ եղեք պատասխանատու եւ հավատարիմ ձեր երդմանը, շարունակ ձգտեք նոր ձեռքբերումների»,-բուժաշխատողներին դիմեց մարզպետը: Մարտունու բժշկական կենտրոնում մարզպետը հավաստեց, որ կենտրոնի նոր շենքի կառուցումը կմեկնարկի այս տարվա վերջերից: «Որոշեցի ձեր մասնագիտական տոնը շնորհավորել անձամբ: Ցանկանում եմ, որ դուք երջանիկ լինեք ձեր անձնական կյանքում, ընտանիքներում, որպեսզի կարողանաք բարձր տրամադրությամբ ու պատասխանատվությամբ իրականացնել ձեր պատվաբեր ու անչափ կարեւոր աշխատանքը: Մաղթում եմ ձեզ առողջություն ու անսպառ հաջողություններ»,-բուժաշխատողներին շնորհավորեց Գնել Սանոսյանը: