Նորություններ
Գեղարքունիքի մարզխորհրդի տարեվերջյան նիստում քննարկվեց օրակարգային երկու հարց
20.12.2018
Գեղարքունիքի մարզպետարանում կայացավ Գեղարքունիքի մարզի խորհրդի տարեվերջյան նիստը, որը վարեց Գեղարքունիքի մարզպետ, մարզի խորհրդի նախագահ Գնել Սանոսյանը: Նիստի օրակարգում քննարկվեց երկու հարց:
§Տեղական բյուջեների սեփական եկամուտների հավաքագրման արդյունքների մասին¦ հարցի շուրջ զեկուցեց Գեղարքունիքի մարզպետարանի աշխատակազմի ֆինանսական եւ սոցիալ-տնտեսական զարգացման վարչության պետ Յուրա Մուշեղյանը: Ըստ զեկուցման՝ 2018 թվականի դեկտեմբերի 17-ի արդյունքներով մարզի տեղական բյուջեների կատարողական ցուցանիշների հավաքագրման մակարդակը կազմում է 79,7 տոկոս, կամ պլանավորված 1 միլիարդ 993 միլիոն 315 հազար 600 դրամի դիմաց փաստացի հավաքագրվել է 1 միլիարդ 587 միլիոն 684 հազար 200 դրամ: Նախորդ տարվա նույն ժամանակամիջոցի համեմատ արձանագրվել է 9,5 տոկոս նվազեցում:Մարզի միջինից ցածր կատարողական են ապահովել Վարդենիսի տարածաշրջանը՝ 65,5 տոկոս եւ Գավառի տարածաշրջանը՝ 77,1 տոկոս: Մարզի 57 համայնքներից միջինից ցածր ցուցանիշներ են ապահովել 30 համայնք: 100 տոկոսից ավել կատարողական են ապահովել Հայրավանքը, Զոլաքարը, Ներքին Գետաշենը, Ծակքարը, Գեղամավանը, Ծովակը: 100 տոկոս կատարողականի շեմին են մոտենում Ձորագյուղ, Երանոս, Վաղաշեն, Սեւան, Սարուխան, Նորաշեն համայնքները:
§Աշխատանքային տարվա ավարտին դեռեւս մեկ շաբաթ ժամանակ կա, ուստի ուզում ենք լիահույս լինել, որ սեփական եկամուտների հավաքագրման մեջ թերացած համայնքները կկարողանան շտկել իրավիճակը եւ ապահովել ավելի բարձր արդյունքներ¦-նշեց Յուրա Մուշեղյանը:
§Մարզի համայնքներում աղբահանության ծառայության կազմակերպման մասին¦ հարցի շուրջ զեկուցեց Գեղարքունիքի մարզպետարանի աշխատակազմի տեղական ինքնակառավարման եւ հանրապետական գործադիր մարմինների հարցերով վարչության պետ Վանիկ Հարությունյանը: Ըստ զեկուցման՝ 2018 թվականի ընթացքում մարզի 57 համայնքներից աղբահանության ծառայություն մատուցվել է 40 համայնքներում, ինքնածախսածածկման եղանակով:
§Ընթացիկ տարում համայնքային բյուջեներում որպես եկամուտ պլանավորվել է 179 միլիոն 115 հազար դրամի չափ աղբահանության գումար:11 ամիսների ընթացքում փաստացի հավաքագրվել է 102 միլիոն 688 հազար դրամ, իսկ տնտեսվարող սուբյեկտների հետ կնքվել է 1725 պայմանագիր:Մարզում գույքագրված 29 աղբավայրերից 7-ը չեն շահագործվում: 22 աղբավայրը սպասարկում է 40 համայնքների:Ինքնածախսածածկման եղանակով աղբահանության ծառայության մատուցումը համայնքների կողմից իրականացվել է վերջին մեկուկես տարվա ընթացքում: Զգալի առաջընթաց ունենք այս ոլորտում, քանի որ ամեն ինչ սկսել ենք զրոյից: Առաջընթացն ակնհայտ է, քանի որ աղբահանությունը մտավ մեր կենցաղավարության մեջ, եւ այն աստիճանաբար դարձել է օրինաչափություն: Կարծում եմ, որ շուտով կյանքի կկոչվի §Կոտայքի եւ Գեղարքունիքի մարզերի կոշտ թափոնների կառավարման ծրագիրը,, որով եւ հիմնովին մեր համայնքների համար լուծում կստանա այս կարեւորագույն հարցը¦,-ներկայացրեց Վանիկ Հարությունյանը:
Նիստի աշխատանքներն ամփոփեց մարզպետ Գնել Սանոսյանը՝ պահանջելով առավել ուշադրության սեւեռում օրակարգային երկու հարցերի շուրջ: §Ձգտեք մինչեւ տարեվերջ ամբողջությամբ հավաքագրել սեփական եկամուտները:Ցուցանիշները որոշ համայնքներում շատ ցածր են ու մտահոգող, քանզի այդ թվերն արտացոլում են տվյալ տեղական ինքնակառավարման մարմնի աշխատանքի իրական պատկերը: Ինչ վերաբերում է աղբահանության կազմակերպման հարցին, ապա պետք է նկատի ունենանք, որ մեր մարզում մենք ունենք համաշխարհային նշանակության այնպիսի հարստություն, ինչպիսին Սեւանա լիճն է, որի աղտոտումը մենք պետք է կանխենք ամեն գնով: Ինչպես փաստում են ստորջրյա լուսանկարներն ու հետազոտությունները, Սեւանա լճի հատակը գրեթե վերածվել է մի հսկայական աղբավայրի, որն առաջացել է կենցաղային աղբը գետերում կամ շրջակա միջավայրում թափելու արդյունքում: Մենք պետք է մարդկանց գիտակցության մեջ արմատավորենք աղբահանության դիմաց վճարումներ կատարելու անհրաժեշտությունը, բացատրելով նրանց, թե ինչ հետեւանքներ կարող է թողնել մեզ վրա աղբի կողքին ապրելն ու այդ աղտոտված օդը շնչելը¦,-շեշտեց մարզպետը:
Գնել Սանոսյանն անդրադարձավ նաեւ Սեւանա լճում ձկնորսության արգելման ռեժիմի խստացուման սահմանմանը՝ կապված սիգի ձվադրման ժամանակահատվածի հետ: Արգելման ռեժիմի խստացումն ուժի մեջ է մտել 2018 թվականի դեկտեմբերի 20-ից եւ տեւելու է մինչեւ 2019 թվականի հունվարի 20-ը: §Մենք արդեն ստորագրել ենք քառակողմ հուշագիր՝ ՀՀ բնապահպանության նախարարության, ՀՀ Ոստիկանության, ՀՀ ընդերքի եւ բնապահպանության տեսչության եւ Գեղարքունիքի մարզպետարանի մասնակցությամբ, որի համաձայն՝ 2018 թվականի դեկտեմբերի 20-ից մինչեւ 2019 թվականի հունվարի 20-ը Սեւանա լճում խստացվում է ձկնորսության արգելքի ռեժիմը: Նշյալ ժամանակահատվածում դադարեցվում է ամեն կարգի ձկնորսություն, Սեւանա լճից դուրս են բերվում բոլոր որսամիջոցներն ու լողամիջոցները, արգելվում է ձկնորսների մուտքը դեպի լիճ: Հորդորում եմ բոլորիդ՝ տեղերում բացատրական աշխատանք տանելու միջոցով նպաստել արգելանքի ռեժիմի պահպանմանը: Հակառակ դեպքում օրինախախտները ստիպված կլինեն պատասխան տալ օրենքի առաջ¦,-մարզխորհրդի անդամներին դիմեց Գեղարքունիքի մարզպետը:
Օգտվելով առիթից՝ մարզպետ, մարզի խորհրդի նախագահ Գնել Սանոսյանը շնորհավորեց մարզխորհրդի անդամներին Ամանորի եւ Սուրբ ծննդյան տոների կապակցությամբ՝ մաղթելով նրանց անձնական երջանկություն եւ աշխատանքային հաջողություններ: