Գեղարքունիքի մարզպետի աշխատակազմ

Գեղարքունիքի մարզպետարանում հրավիրված հերթական խորհրդակցության ընթացքում մարզպետ Գնել Սանոսյանին ներկայացվեցին մարզի առողջապահական հաստատություններում 2018 թվականի   12 ամիսներին կատարված աշխատանքների, ինչպես նաև՝սքրինինգային հետազոտությունների արդյունքները: Հանդիպմանը մասնակցեցին մարզի բոլոր բուժհաստատությունների տնօրենները:

Մարզի հիվանդանոցային և արտահիվանդանոցային ծառայություններ մատուցող բուժհաստատությունների 2018 թվականի 12 ամիսների և սքրինինգային հետազոտությունների արդյունքների մասին զեկուցեց Գեղարքունիքի մարզպետարանի առողջապահության և սոցիալական ապահովության վարչության պետ Անուշ Պողոսյանը: Ըստ զեկուցողի՝մարզի առողջապահական հաստատությունները 12 ամիսների ընթացքում, բացառությամբ Վարդենիսի հիվանդանոցի, պարտքեր չեն կուտակել, իսկ գրանցված արդյունքները գոհացուցիչ են թե հիվանդանոցային ու արտահիվանդանոցային ծառայությունների մատուցման, թե սքրինինգային հետազոտությունների անցկացման ուղղություններում:  Վարչության պետը ներկայացրեց     նաև մի շարք օրինակելի բուժհաստատությունների ցույց տված դրական արդյունքները, որոնք ձեռք են բերվել հետևողական աշխատանքի արդյունքում: Հիվանդանոցային ծառայություններ մատուցող բուժհաստատություններում վճարովի ծառայությունների կատարողականը տարվա պլանավորածի դիմաց կազմել է շուրջ 80 տոկոս, իսկ մարզի առողջապահական համակարգի գլոբալ բյուջեն կատարվել է 95 տոկոսով: Շաքարային դիաբետի ախտորոշման հետազոտությունը կատարվել է 95,զարկերակային գերճնշմանը՝ 131 և արգանդի պարանոցի քաղցկեղինը՝շուրջ 82 տոկոսով: § Ինչպես նախորդ տարում, այս տարի ևս մենք սքրինինգային ծրագրի կատարողական արդյունքներով Հանրապետությունում զբաղեցնում ենք առաջին տեղը: Այդ հետազոտությունները ոչ միայն կարևոր են մի շարք վտանգավոր հիվանդությունների կանխարգելման ու բուժման տեսանկյունից, այլ նաեւ լրացուցիչ ֆինանսական հոսքեր են ապահովում մարզի բուժհաստատությունների համար: Բացի մի քանի բուժհաստատություններից, հիմնական մասը սքրինինգային հետազոտությունները կատարել են բարձր արդյունքներով: Լավագույն արդյունքներ են ապահովել Վարդենիսի պոլիկլինիկան, Ակունքի, Գեղհովիտի, Մեծ Մասրիկի, Ծովակի, Լուսակունքի ԱԱՊԿ-ները, Ճամբարակի առողջության կենտրոնը և Դպրաբակի, Երանոսի, Զոլաքարի, Ծովինարի բուժամբուլատորիաները: Հետեւողական ու արդյունավետ աշխատանքի շնորհիվ նախորդ տարվանից մնացած պարտքերը մարել եւ մնացորդային գումարներ են ստեղծել Վաղաշենի եւ Լճաշենի ԱԱՊԿ-ները, Նորատուսի բուժամբուլատորիան: Հիվանդանոցային վճարովի ծառայությունների համար սահմանված նիշը գերակատարել է Ճամբարակի առողջության կենտրոնը,իսկ սահմանված նիշը կատարել է Գավառի ԲԿ-ն: Ընդհանուր առմամբ, մենք տարին եզրափակում ենք բարձր ու գոհացուցիչ արդյունքներով¦-ներկայացրեց Անուշ Պողոսյանը:

Հանդիպումն ամփոփեց Գեղարքունիքի մարզպետ Գնել Սանոսյանը՝ դրվատելով մարզի բուժհաստատությունների ղեկավարների եւ բուժանձնակազմերի արդյունավետ աշխատանքը: §Իմ գոհունակությունն եմ հայտնում ներկայացված թվերի համար, որոնք արտացոլում են ձեր կատարած դրական աշխատանքի պատկերը: Համոզված եմ, որ նկատված թերությունները եւ բացթողումները կկարողանաք ուղղել մինչեւ տարեվերջ ու աշխատանքային տարին փակել ավելի բարձր արդյունքներով: Միաժամանակ ձեզ հորդորում եմ՝ տոն օրերին առավել ուշադիր լինել ձեր մասնագիտական աշխատանքում, ամենայն պատասխանատվությամբ արձագանքել բոլոր կանչերին, հոգատարություն ցուցաբերել յուրաքանչյուր հիվանդի նկատմամբ¦-շեշտեց մարզպետ Գնել Սանոսյանը: