Գեղարքունիքի մարզպետի աշխատակազմ

Գեղարքունիքի մարզի կրթական 14 հաստատություններ իրենց տնտեսած միջոցների հաշվին 2017 թվականի ընթացքում դպրոցներում իրականացրել են հիմնանորոգման տարաբնույթ աշխատանքներ, լուծում տալով մի շարք կարևորագույն խնդիրների: ,,2017 թվականի ընթացքում մարզի մի քանի դպրոցների տնօրեններ դիմեցին Գեղարքունիքի մարզպետ Կարեն Բոթոյանին, տնտեսված միջոցների հաշվին դպրոցներում հիմնանորոգման կարևորագույն ծրագրեր իրականացնելու թույլտվություն ստանալու նպատակով: Մարզպետն ընդառաջեց, դպրոցների կողմից հայտարարվեց մրցույթ, այնուհետև մեկնարկեցին շինարարական աշխատանքները:Թվարկված բոլոր հաստատություններում աշխատանքները ավարտվել են տարեվերջին և արդյունքում ունենք արտաքին միջավայրից պահպանված կառույցներ և վերանորոգված սանհանգույցներ,, - իր խոսքում նշեց Գեղարքունիքի մարզպետարանի աշխատակազմի քաղաքաշինության վարչության պետ Արմեն Զոհրաբյանը: 6 միլիոն դրամի ներդրմամբ հիմնանորոգվել են Գավառի թիվ 7 միջնակարգ դպրոցի սանհանգույցները, 7 միլիոնով՝ Սարուխանի թիվ 2 միջնակարգ դպրոցում հիմնանորոգվել է սպորտդահլիճի հատակը եւ կատարվել շենքի եզրագծի ասֆալտապատում, Նորատուսի թիվ 2 միջնակարգ դպրոցում 2,1 միլիոն դրամով լուծվել է ճաշարանի ջրի խնդիրը, տեղադրվել մետաղապլաստե դուռ եւ պատուհաններ: Ամենաշատ գումարը տնտեսվել է Զովաբերի միջնակարգ դպրոցում, 12 միլիոն դրամով իրականացվել են սանհանգույցների եւ միջանցքի հատակի վերանորոգման, սեպտիկ հորի կառուցման աշխատանքներ: Տնտեսված 8 միլիոն դրամի հաշվին Սեւանի թիվ 3 հիմնական դպրոցում տեղադրվել են նոր պատուհաններ, իսկ Սեւանի թիվ 4 հիմնական դպրոցում 4 միլիոն դրամով նորոգվել է տանիքը եւ 1 դասասենյակ: 6 միլիոնի հաշվին դասասենյակներ են վերանարոգվել Մարտունու թիվ 1 հիմնական դպրոցում: Ծակքարի միջնակարգ դպրոցում 9 միլիոնով կառուցվել է կաթսայատուն, Վարդենիսի թիվ 2-ում՝ 10 միլիոնով կատարվել ներքին հարդարում: Վարդենիսի թիվ 3 հիմնական դպրոցում տնտեսված 5 միլիոնով ճաշարան եւ ուսուցչանոց են վերանորոգել, 4 միլիոնով սանհանգույցներ են հիմնանորոգվել Ակունքի միջնակարգ դպրոցում: Նորակերտի միջնակարգ դպրոցում 3 եւ Ճամբարակի թիվ 2 հիմնական դպրոցում 5 միլիոն դրամով տեղադրվել են նոր պատուհաններ: Իր տնտեսած 10 մլն էլ Կարճաղբյուրի միջնակարգը ներդրել է տանիքի եւ ճաշարանի վերանորոգման համար, անցկացվել ջրամատակարարման համակարգ: