Գեղարքունիքի մարզպետի աշխատակազմ

Գեղարքունիքի մարզպետ Ռաֆիկ Գրիգորյանի հանձնարարությամբ Նորաշեն համայնքում 2016 թվականի նոյեմբերից հաշվառված, սոցիալապես ծանր վիճակում գտնվող եւ կենցաղային վատթարագույն պայմաններում բնակվող Մարատ Քառյանի վեց շնչից բաղկացած ընտանիքին է այցելել Գեղարքունիքի մարզպետարանի աշխատակազմի աշխատանքային խումբը՝ արձագանքելով <<Հետք>>-ում հրապարակված համապատասխան հոդվածներին: Ինչպես տեղեկացրեց  աշխատանքային խմբի ղեկավար, Գեղարքունիքի մարզպետարանի աշխատակազմի ընտանիքի, կանանց եւ երեխաների իրավունքների պաշտպանության բաժնի վարիչ Մամիկոն Գալոյանը, Գեղարքունիքի մարզպետի կողմից Մարատ Քառյանի ընտանիքին հատկացվել է դրամական  օգնություն՝ 100 հազար դրամի չափով, ինչպես նաեւ ուսումնասիրվել է ընտանիքի սոցիալական վիճակը, ապրելակերպը, պետական նպաստի հատկացման չափը, հաշվառման ժամկետները:  <<Մարատի ընտանիքը, որը մեր մարզ բնակության է տեղափոխվել 2016 թվականի նոյեմբերից, Կոտայքի մարզի Պտղնի համայնքից, համաձայն օրենքով սահմանված կարգի, հաշվառվել է ընտանիքների անապահովության գնահատման համակարգում եւ փետրվար ամսից ստացել 37500 դրամ ընտանեկան նպաստ: 2017 թվականի մարտ ամսին Մարատի ընտանիքում ծնվել է չորրորդ երեխան, ուստի ապրիլ ամսից  նպաստի չափը դառնում է 48 հազար դրամ:Մարզպետի հանձնարարությամբ սոցիալական ծայրահեղ կարիքի մեջ գտնվող այս ընտանիքը  վերցվել է հաշվառման եւ գտնվելու է մարզպետարանի մշտական ուշադրության եւ հոգածության ներքո>>,-ներկայացրեց աշխատանքային խմբի ղեկավարը: