Գեղարքունիքի մարզպետի աշխատակազմ

Գեղարքունիքի մարզպետարանի կողմից մարզի համայնքներում շարունակվում են կազմակերպվել ,,Առողջապահական բաց դռների օրեր,, միջոցառումները, որոնց նպատակն է՝ բժշկությունն ավելի մոտեցնել բնակչին և նպաստել առողջական խնդիրների վաղ հայտնաբերմանն ու դրանց բուժմանը: Հոկտեմբերի 1-ին հերթական ,,Բաց դռները,, կազմակերպվեց Կարմիրգյուղ համայնքի բնակչության համար: Առողջական խնդիրներ ունեցող քաղաքացիները բուժհետազոտումից իրենց գոհունակությունը հայտնեցին Գեղարքունիքի մարզպետի նախաձեռնությամբ համայնքներում իրականացվող ծրագրից, միաժամանակ անհրաժեշտ համարելով, , որ այն կրի պարբերական բնույթ:,, Մեր համայնքի բնակիչները նման միջոցառումների անհրաժեշտությունը շատ ունեն: Լավ կլիներ, որ յուրաքանչյուր եռամսյակը մեկ անգամ այն կազմակերպվեր, մենք էլ կհետազոտվեինք ու մեր խնդիրների լուծման ուղղությամբ համապատասխան միջոցներ կձեռնարկեինք: Շնորհակալ ենք նախաձեռնողներին և այն իրականացնողներին,,-իրենց խոսքերում նշեցին համայնքի բնակիչները: Այցելուներն իրենց խնդիրներով հետազոտվեցին Գավառի և Մարտունու բժշկական կենտրոններից ժամանած ՝ էնդոկրինոլոգի, կարդիոլոգի, վիրաբույժի, գինեկոլոգի, անոթային վիրաբույժի, ուռոլոգի, ակնաբույժի, նեվրոպաթոլոգի և քիթ կոկորդի բժշկի կողմից: Հետազոտվածների մի մասի բուժումը նշանակվեց տեղում: ,,Բաց դռների օրեր,, միջոցառման ընթացքում առանձնակի ուշադրության են արժանանում զինվորական հաշմանդամները: ,,Զինվորական հաշմանդամների հետ զրույցի ընթացքում պարզ դարձավ, որ ամենամեծ խնդիրը դեղորայքի խնդիրն է, հատկապես այն դեղորայքի, որն ընդգրկված չէ ՀՀ Առողջապահության նախարարության կողմից հաստատված դեղորայքի հիմնական ցանկում: Գեղարքունիքի մարզպետի հետ ունեցած քննարկման արդյունքում որոշվել է, որ անհրաժեշտ դեղորայքը հանձնաժողովային կարգով այսուհետ տրամադրվի զինվորական հաշմանդամներին,, - իր խոսքում նշեց Գեղարքունիքի մարզպետարանի աշխատակազմի ԱՍԱ վարչության պետ Անուշ Պողոսյանը:
Կարմիրգյուղի բուժամբուլատորիան սպասարկում է մոտ 6300 բնակչի: Այն հանդիսանում է առաջնային բուժօղակ համայնքի համար: ,,Այստեղ բժշկական սպասարկումն իրականացվում է երկու ընտանեկան բժիշկի և մեկ թերապեվտի կողմից:Ունենք լաբորատորիա, էլեկտրոսրտագրության հնարավորություն: Սակայն այսօրվա հետազոտությունները կարևոր են այնքանով, որ այսօր ներկա են նեղ մասնագետ բժիշկները, որոնց կողմից իրականացվող հետազոտությունները կնպաստեն մեր բնակչության առողջական խնդիրների վաղ հայտնաբերմանը և կանխարգելմանը,,-նշեց Կարմիրգյուղի ԲԱ տնօրեն Լուսինե Մուսոյանը: Ընդհանուր առմամբ ,,Բաց դռներին,, մասնակցեց 91 քաղաքացի: Գեղարքունիքի մարզպետարանի աշխատակազմի ԱՍԱ վարչության պետ Անուշ Պողոսյանի հավաստմամբ, այցելուների մոտ 30 տոկոսը լրացուցիչ հետազոտման և բուժումը տեղում կազմակերպելու նպատակով կուղեգրվի Գավառի բժշկական կենտրոն: