Գեղարքունիքի մարզպետի աշխատակազմ

Գեղարքունիքի մարզում ավարտվեցին 2016 թվականի Ապրիլյան հերոսամարտերում հայրենիքի սահմանների պաշտպանության համար իրենց կյանքը նվիրաբերած հերոս զինծառայողների անուններով նախնական զինվորական պատրաստության դասասենյակների անվանակոչության արարողությունները: Հիշատակի և ոգեկոչման հերթական միջոցառումները տեղի ունեցան Փոքր Մասրիկ, Գեղամասար և Արեգունի համայնքների միջնակարգ դպրոցներում, որտեղ նախնական զինվորական պատրաստության դասասենյակները դպրոցների մանկավարժական խորհուրդների որոշմամբ կրեցին հայրենիքի սահմանները պաշտպանելիս զոհված զինծառայողներ Վրեժ Սարգսյանի, Կորյուն Հարությունյանի և Հարություն Աբրահամյանի անունները: Վերոնշյալ դպրոցներում դասասենյակների անվանակոչություններն ընթացան հանդիսավոր պայմաններում, որոնց մասնակցեցին Գեղարքունիքի մարզպետի տեղակալ Կարեն Հակոբյանը, մարզպետարանի կրթության, մշակույթի և սպորտի վարչության պետ Գարիկ Բադալյանը, համայնքների ղեկավարներ, մանկավարժներ ու աշակերտներ: Հրավիրված էին զոհված հերոսների ծնողներն ու հարազատները: Անվանակոչման միջոցառումները վերածվեցին հայրենասիրության, արիության բաց դասերի, որոնք ներկայացրեցին դպրոցների տարբեր դասարանների աշակերտները: Նախնական զինվորական պատրաստության դսասենյակներում ստեղծված էին հերոսների անկյուններ, որտեղ տեղադրված էին նրանց պարգևները, անձնական իրեր ու լուսանկարներ: Կազմակերպված միջոցառումների ընթացքում աշակերտները ներկայացրեցին իրենց ավագ ընկերների, սիրված և հարգված աշակերտների կենսագրական տվյալները, խոսեցին, նրանց կյանքի հերոսական արարքների, ցուցաբերած հաղթական կամքի ու անվեհերության մասին: Դպրոցականները հերոս տղաների լուսանկարների առջև երդվեցին՝ միշտ վառ պահել նրանց հիշատակը, նրանց հերոսական արարքներից դասեր քաղել և հայրենասիրության վեհ գործի արժանի շարունակողը լինել: ՙ Մենք մարզում արդեն 9-րդ դասասենյակն ենք անվանակոչում Ապրիլյան քառօրյայում հայրենիքի պաշտպանական դիրքերում զոհված հայ քաջորդիների անուններով: Դպրոցներում նման դասասենյակների առկայությունը կարևոր նշանակություն ունի մատաղ սերնդի հայրենասիրական դաստիարակության համար: Մենք խոնարհվում ենք հայրենիքի համար արյուն թափած հերոս տղաների հիշատակի, նրանց ծնողների և զավակների առջև: Թող մեր երկրում այսուհետ թևածի միայն խաղաղությունը, և ոչ մի սերունդ այլևս չտեսնի պատերազմ ու կորուստ,, -իր խոսքում նշեց Գեղարքունիքի մարզպետի տեղակալ Կարեն Հակոբյանը: ,,Հայրենիքի պաշտպանությունը նրա համար ամենաառաջնային տեղում էր, ես միշտ նրան ասում էի, որդիս նախ հայրենիք, ապա ընտանիք: Այդպես էլ վարվեց, առաջնահերթությունը տվեց հայրենիքի պաշտպանության Սուրբ գործին: Աստծով ենք մխիթարվում, մարդկանցով ենք մխիթարվում,ովքեր մեր կողքին են ու մեկ էլ իմ հերոս որդուս երեք զավակներով,որոնք մեզ ստիպում են, որ շարունակենք ապրել,, -իր խոսքում նշեց Հարություն Աբրահամյանի հայրը՝ Արեգունի համայնքի բնակիչ, ազատամարտիկ Հովհաննես Աբրահամյանը: ,,Մի կողմից ցավը մեծ ա, մյուս կողմից հպարտություն եմ ապրում, որ այդպիսի որդի եմ ունեցել: Էսօր մեր բոլորի պարտքն է՝ պաշտպանել մեր հայրենիքը: Շնորհակալ եմ բոլոր նրանց, ովքեր այսօր մեր կողքին են, շնորհակալ եմ այն մարդկանց, որոնց շնորհիվ մեր ազգը մի բռունցք դարձավ, ու թշնամին հասկացավ, որ այլևս առաջ գնալու տեղ չունի: Որդիս մի զավակ է թողել, որին պետք է պահենք, մեծացնենք ու դաստրարակենք այն ոգով, ինչպիսին նրա հայրն է եղել,,- նշեց հերոս զինծառայող Վրեժ Սարգսյանի հայր, Փոքր Մասրիկ Գյուղի բնակիչ Վարդան Սարգսյանը: <<Կորյուն Հարությունյանը դեռ փոքր հասակից աչքաբաց էր, ուշիմ, խելացի, շատ էր սիրում մեխամիզմները, եւ Հայոց բանակում շատ արագ տիրապետեց տանկիստի մասնագիտությանը: Ապրիլյան քառօրյա մարտերի ընթացքում նա իր ծառայակիցների հետ անսանսան կանգնեց հայրենիքի պաշտպանության դիրքերում: Այս սենյակում դրված են մեր սիրելի Կորյունի զինվորական իրերը, պարգեւները, որոնք մեզ ու գալիք սերունդներին կհիշեցնեն մեր հերոս տղայի մասին>>,-նշեց Գեղամասար գյուղի բնակիչ, Կորյուն Հարությունյանի հորեղբայր Վրեժ Հարությունյանը:
Հայրենիքի սահմանները պաշտպանելիս ցուցաբերած անվեհերության և խիզախության, կյանքին սպառնացող վտանգի պայմաններում ծառայողական պարտքը հերոսաբար կատարելու համար Վրեժ Սարգսյանը, Կորյուն Հարությունյանը և Հարություն Աբրահամյանը հետմահու պարգևատրվել են ,, Մարտական ծառայության համար.. եւ ,, Արիության,, մեդալներով: