Նորություններ
Գեղարքունիքի մարզպետը Սեւանի տարածաշրջանում դիտարկեց շինարարական աշխատանքների ընթացքը
18.08.2016
Գեղարքունիքի մարզպետ Ռաֆիկ Գրիգորյանը Սևանի տարածաշրջան կատարած աշխատանքային այցի շրջանակներում դիտարկեց դպրոցական եւ նախադպրոցական առանձին հաստատություններում իրականացվող շինարարական աշխատանքների ընթացքը: Մարզպետի այցի առաջին կանգառը Սեւան քաղաքի համար 1 հիմնական դպրոցն էր: Այստեղ ՀՀ պետական բյուջեի միջոցների հաշվին նախորդ տարի իրականացվել են մասնակի վերանորոգման աշխատանքներ, իսկ այս տարի նույն միջոցների հաշվին դպրոցում անցկացվում է ջեռուցման ընդհանուր համակարգ: Իրականացվող աշխատանքների վերաբերյալ մարզի ղեկավարը տվեց ցուցումներ և հանձնարարականներ, նշելով, որ հաջորդ տարի, ֆինանսական միջոցների առկայության դեպքում, հնարավոր կլինի ավարտին հասցնել դպրոցում կիսատ մնացած աշխատանքները: Ռաֆիկ Գրիգորյանն այնուհետև այցելեց Գեղամավան և Դդմաշեն համայնքներ, որտեղ ծանոթացավ մանկապարտեզներում իրականացվող վերանորոգման աշխատանքներին: ՙՙՀՀ Տարածքային Զարգացման հիմնադրամիՙՙ ֆինանսավորմամբ Գեղամավան համայնքում նախորդ տարիների ընթացքում իրականացվել են մանկապարտեզի 2 մասնաշենքերի հիմնանորոգման աշխատանքները: Նույն հինադրամի ֆինանսավորմամբ այս տարի իրականացվում է մանկապարտեզի երրորդ մասնաշենքի վերանորոգումը: Հիմնադրամը հոգացել է նաև մանկապարտեզի գույքային և տեխնիկական հագեցվածության խնդիրը: Ըստ շինարարի` մոտ մեկ ամիս հետո 120 տեղանոց մանկապարտեզն ամբողջովին պատրաստ կլինի՝ ընդունելու համայնքի նախադպրոցական տարիքի սաներին: Դդմաշեն համայնքում մարզպետ Ռաֆիկ Գրիգորյանը ծանոթացավ ՚՚ՀՀ Տարածքային Զարգացման հիմնադրամի՚՚ ֆինանսավորմամբ իրականացվող մանկապարտեզի երրորդ մասնաշենքի հիմնանորոգման աշխատանքների ընթացքին: Մանկապարտեզի 2 մասնաշենքերի հիմնանորոգման աշխատանքներն իրականացվել են նախորդ տարիների ընթացքում Գեղարքունիքի մարզին, հրատապ լուծում պահանջող հիմնախնդիրների համար, պետության կողմից հատկացված ֆինանսական միջոցների հաշվին: 90-ականներից իր գործունեությունը դադարեցրած նախադպրոցական հաստատությունը մինչև նոյեմբեր պատրաստ կլինի՝ ընդունելու իր սաներին: Գեղարքունիքի մարզպետ Ռաֆիկ Գրիգորյանը շինարարական կառույցներում կատարած շրջայցից հետո առաջարկեց Գեղամավանի եւ Դդմաշենի գյուղապետերին` սկսել նախադպրոցական տարիքի երեխաների հավաքագրման գործընթացը և նրանց միջոցով նախապատրաստել ծրագիր` մանկապարտեզների բացման արարողությանը հանդիսավոր տեսք տալու համար: Մարզպետը նաեւ խորհուրդ տվեց համայնքների ղեկավարներին՝ նախադպրոցական հաստատություններում աշխատանքի ընդունել բացառապես բանիմաց, գրագետ ու փորձ ունեցող դաստիարակների, իսկ անհրաժեշտության դեպքում նրանց գործուղել վերապատրաստման: