Գեղարքունիքի մարզպետի աշխատակազմ

Սեւան քաղաքի մշակույթի պալատում բացվեց ՙ100 դուռ՚ լուսանկարչական աշխատանքների ցուցահանդեսը, որտեղ ներկայացվեցին Հայաստանից, Արցախից, Ջավախքից եւ Արեւմտյան Հայաստանից ընտրված 100 վանքերի եւ եկեղեցիների դռների լուսանկարները: Ցուցահանդեսն օրհնեց Գեղարքունյաց թեմի Սեւանի տարածաշրջանի հոգեւոր հովիվ Տեր-Նշան քահանան: Ապա ներկաները տեսաֆիլմի միջոցով ծանոթացան ՙ100 դուռ՚ լուսանկարչական ցուցահանդեսի նախապատմությանը, գրանցած հաջողություններին ու աշխարհագրական տարածմանը, ձեռք բերած ազգապահպան նշանակությանը: Ինչպես ներկայացրեց ցուցահանդեսի նախաձեռնության հեղինակ Խաչիկ Եղոյանը, ընտրվել են հայոց վանքերի ու եկեղեցիների այնպիսի դռների լուսանկարներ, որոնցով դարեր շարունակ մարդիկ ներսուդուրս են արել, մոմ վառել ու աղոթք արել առ Աստված: ՙՄտահղացումն իմ մեջ առաջացավ Սուրբ Հռիփսիմե եկեղեցու բակում, երբ ես հասկացա, որ դա մի ուխտ է, որը պետք է կյանքի կոչեմ: Նախաձեռնության իրականացմանը միացավ ճանաչված լուսանկարիչ Ռուբեն Մարտիրոսյանը եւ Տեր-Շմավոն քահանան: Շրջեցինք քաղաքներով, մարզերով, համայնքներով եւ երկամյա դժվարին, սակայն հաճելի աշխատանքներից հետո, մեր անձնական հնարավորությունների շրջանակներում, նախաձեռնությունը իրականություն դարձրինք՚,- ասաց Խաչիկ Եղոյանը: Այն առաջին անգամ հասցվել է ցուցադրվել Հայոց ցեղասպանության 100-ամյա տարելիցի միջոցառումների ամփոփման ժամանակ: Իսկ 2016 թվականը նախաձեռնողների կողմից հայտարարվել է շրջագայությունների տարի: Հայաստանի Հանրապետության մարզերում սա երկրորդ ցուցադրությունն է, իսկ Գեղարքունիքի մարզում՝ արդեն երրորդը՝ Գավառ եւ Մարտունի քաղաքներից հետո: Նախաձեռնողներն առաջարկներ ունեն տարբեր երկրներից, բայց իրենց գերնպատակը լուսանկարները Ստամբուլում ցուցադրելն է, որը կյանքի կկոչվի առաջիկայում: