Գեղարքունիքի մարզպետի աշխատակազմ

Հուլիսի 28-29-ին Գեղարքունիքի մարզպետ Ռաֆիկ Գրիգորյանի բարձր հովանու ներքո Գեղարքունիքի մարզի Գավառ, Սեւան, Մարտունի եւ Վարդենիս քաղաքներում հյուրախաղերով հանդես եկան Երեանի պետական կրկեսի Լեոնիդ Ենգիբարյանի անվան դպրոց-ստուդիայի սաները: Երեւանի պետական կրկեսի գլխավոր ռեժիսոր Նաիրա Պետրոսյանի տեղեկացմամբ, կրկեսի դերասանները կրկեսային բազմաժանր համարները հանդիսատեսին ներկայացրին անվճար, լեփլեցուն դահլիճներում: ՙՄարտունիում ու Վարդենիսում մեր ներկայացումները դիտելու եկան զինվորականներ, Գավառում՝ մանկատան սաները: Դերասանների կողմից ներկայացվեցին աճպարարության, ձեռնածության, յոգայի, օղակային մարմնամարզության, օղակներով խաղի, լիմպոյի, անտիպոտի հետաքրքիր համարներ:Հանդիսատեսների մեջ առավել մեծ թիվ էին կազմում մանկահասակ երեխաներն ու դպրոցականները: Բոլոր տեղերում էլ մեր կատարումները սկզբից մինչեւ վերջ ներկաները դիմավորել եւ ուղեկցել են ծափողջյուններով՚,-ներկայացրեց Նաիրա Պետրոսյանը: Իրենց տպավորություններով կիսվեցին նաեւ հանդիսատես ծնողները: ՙՀաճելի եւ գնահատելի է, որ այսօր մեր երեխաները, առանց մայրաքաղաք հասնելու եւ առանց այլ ծախսեր կատարելու, անվճար հիմունքներով կարողացան կրկեսային ներկայացումներ դիտել: Շնորհակալ ենք թե հովանավորին, թե կրկեսի ղեկավարներին ու դերասաններին, որ մեզ ու մեր երեխաների համար նման զվարճալի համարներ դիտելու հնարավորություն ստեղծեցին՚,- կրկեսային ներկայացումից հետո Գավառ քաղաքի մշակույթի պալատում նշեցին մի խումբ ծնողներ: