Գեղարքունիքի մարզպետի աշխատակազմ

Գեղարքունիքի մարզի քաղաքային եւ գյուղական բոլոր համայնքներում Հայրենական մեծ պատերազմի,Արցախյան ազատամարտի վետերանների, առաջնագծից վերադարձած կամավորականների, ավագ ու կրտսեր սերնդի երկրապահների մասնակցությամբ շուքով նշվեց Մայիսիննյան հաղթանակների օրը: Վաղ առավոտից մարդաշատ էին Մեծ հայրենականի եւ Արցախյան ազատամարտի զոհերի հուշարձաններ տանող ճանապարհները: Ամենատարբեր տարիքի մարդիկ, բազմաթիվ դպրոցականներ, համայնքների ղեկավարների գլխավորությամբ ծաղիկներ ու ծաղկեպսակներ էին խոնարհում Մեծ հայրենականի եւ Արցախյան ազատամարտի զոհերի հիշատակը հավերժացնող հուշարձաններին, իրենց զորակցությունը հայտնում առաջնագծում կանգնած հայ զինվորներին: Գավառ քաղաքի Սուրբ Աստվածածին եկեղեցում, ի նշանավորում Մայիսյան հաղթանակների եւ ի հիշատակ հերոսամարտերում նահատակված հայ զինվորների, Գեղարքունյաց թեմի հոգեւոր դասի մասնակցությամբ կատարվեց պատվո կարգ եւժամերգության արարողություն: Միջոցառումների ընթացքում համայնքների մշակութային հաստատությունների սաների ուժերով կազմակերպվեցին տոնական համերգներ՝ նվիրված Մայիսյան եռատոնին, հայ զինվորների գործած պատմական սխրանքներին: Համայնքապետարանների կողմից Մեծ հայրենականի եւ Արցախյան ազատամարտի վետերանները, Արցախյան ազատամարտում զոհված զինծառայողների ընտանիքներն արժանացան դրամական պարգեւների: Նրանց պատվին տրվեց նաեւ տոնական ճաշկերույթ: Մեծ հայրենականի վետերաններն իրենց տոնական տրամադրությանը միախառնել էին հայրենի երկրի սահմաններն ամուր ու խաղաղ տեսնելու ցանկությունը, հպարտանալով սահմանապահ զինվորի անկոտրուն կամքով ու սխրագործությամբ: