Գեղարքունիքի մարզպետի աշխատակազմ

Գեղարքունիքի մարզի հանրակրթական դպրոցներում փետրվարի 1-ից վերսկսվել են ուսումնական պարապմունքները: Գեղարքունիքի մարզպետարանի աշխատակազմի առողջապահության եւ սոցիալական ապահովության վարչության կողմից կատարված առաջին օրվա ուսումնասիրությունները ցույց են տվել, որ աշակերտների հաճախելիությունը բավարար է, իսկ դասասենյակներում ապահովվել է սենյակային նախատեսված ջերմաստիճանը: Գեղարքունիքի մարզպետարանի աշխատակազմի առողջապահության եւ սոցիալական ապահովության վարչության պետ Անուշ Պողոսյանի հավաստմամբ`  Գեղարքունիքի մարզպետարանի կողմից դպրոցներում վերահսկողություն կիրականացվի առաջիկա 10 օրերի ընթացքում: ,,Յուրաքանչյուր համայնքում, բացի մեր անմիջական այցերը, ընտանեկան բժիշկների միջոցով կատարվում է ինչպես աշակերտների, այնպես էլ դասասենյակների ջերմաչափում: Եթե աշակերտները ջերմում են կամ ունեն սուր շնչառական հիվանդությունների նախանշաններ, ապա նրանք ազատվում են դասերից: Առաջին օրը հաճախելիությունը կարելի է բավարար համարել իսկ առկա բացակայությունները պայմանավորել առանձին աշակերտների հիվանդությամբ: Մեր կողմից իրավիճակը կվերահսկվի այնքան ժամանակ, մինչեւ որ ամբողջությամբ նահանջեն սուր շնչառական հիվանդությունները: Նախադպրոցական հաստատությունները մարզում կբացվեն փետրվարի երկրորդ կեսին, ինչպես որոշել են տեղական ինքնակառավարման մարմինները,, - նշեց վարչության պետը:
Նույն աղբյուրի հավաստմամբ փետրվարի 1-ի դրությամբ Գեղարքունիքի մարզի հիվանդանոցներում սուր շնչառական հիվանդություններից ապաքինվողների թիվն արդեն հասել է 33-ի, որը վերջին տաս օրերի համեմատ նվազել է 49 դեպքով: