Գեղարքունիքի մարզպետի աշխատակազմ

Գեղարքունիքի մարզի միջպետական, հանրապետական եւ տեղական նշանակության ճանապարհներին դժվարանցանելի վիճակ առաջացավ հունվարի 24-26-ին տեղացած առատ ձյան եւ բքերի հետեւանքով: Ճանապարհների ձմեռային սպասարկումն ու պահպանությունն իրականացնող կազմակերպությունների շուրջօրյա աշխատանքի արդյունքում հունվարի 27-ի հետկեսօրին մարզի միջպետական եւ հանրապետական նշանակության ճանապարհները, բացառությամբ Վարդենյաց լեռնանցքի, ամբողջությամբ բաց են եւ երթեւեկելի, ընթացքի մեջ են մարզային նշանակության ճանապարհների մաքրման, լայնացման եւ մշակման աշխատանքները: Գեղարքունիքի մարզպետարանի աշխատակազմի քաղաքաշինության վարչության տրանսպորտի եւ ճանապարհաշինության բաժնի տվյալներով տեղացած ձյան բարձրությունը կազմել է 30-ից մինչեւ 60 սանտիմետր: ՙԱրդեն երրորդ օրն է, ինչ արտակարգ ռեժիմով են աշխատում ճանապարհաշինարարները` հիմնականում ապահովելով միջպետական եւ հանրապետական նշանակության ճանապարհների անցանելիությունը:Հունվարի 26-ի կեսօրից ողջ տեխնիկան աշխատում է արդեն մարզային ճանապարհների մաքրման եւ մշակման ուղղությամբ:Քաղաքներում եւ գյուղական առանձին խոշոր համայնքներում եւս ձեռնարկվում են ներհամայնքային ճանապարհների մաքրման աշխատանքներ: Եթե մոտակա ժամերի ընթացքում նոր բուք չդիտվի, ճանապարհաշինարարներն ամբողջությամբ կապահովեն նաեւ մարզային նշանակության բոլոր ճանապարհների անցանելիությունը՚,- հավաստեց Գեւորգ Խաչատրյանը:
Տեղեկացվում է նաև, որ Վերին-Գետաշեն-Մադինա ճանապարհը փակվել է մոտ 10 կիլոմետր երկարությամբ, որի կեսն արդեն մաքրվել է ձյան բարձր շերտից, իսկ Վարդենյաց լեռնանցքում Մարտունի-Գետափ ճանապարհը փակ է մոտ 20 կիլոմետր, որի մաքրման համար աշխատում են 3 միավոր տեխնիկա: