Պաշտոնական էլ. փոստ
(միայն www.e-citizen.am համակարգով ծանուցումների համար)
Նորություններ
Գավառի Սուրբ Կարապետ եկեղեցում ցուցադրման է բերվել Հին Բայազետի Բերդի երկփեղկ դռներից մեկը
15.04.2015
Գավառ քաղաքի Սուրբ Կարապետ եկեղեցում ապրիլի 15-ին ցուցադրման ներկայացվեց Հին Բայազետի Բերդի երկփեղկ դռներից մեկը: Ցուցադրությունը նախաձեռնել էր Գավառ քաղաքի բնակիչ, Սուրբ Կարապետ եկեղեցու վերականգնման և վերաբացման հովանավոր Սամվել Սինանյանը: Առաջին ցուցադրությանը մասնակցեցին Գեղարքունիքի մարզի և Գավառ քաղաքի ղեկավար այրերը, քաղաքի կրթամշակութային հաստատությունների ներկայացուցիչներ, մտավորականներ: Ինչպես ներկայացրեց Սամվել Սինանյանը` Հին Բայազետի բերդի մուտքի երկփեղկ մետաղակուռ դուռը պատրաստվել է 18-րդ դարում և կշռում է 1600 կիլոգրամ: Այն Հին Բայազետի հայերը իրենց հետ Արևելյան Հայաստան են տեղափոխել 1830 թվականի գաղթի ժամանակ: Այդ դռները 1835 թվականին տեղադրվել են Երևանի Սուրբ Պողոս-Պետրոս եկեղեցու մուտքի վրա, իսկ երբ սովետական կարգերի ժամանակ քանդվել է եկեղեցին, դռները հանգրվանել են Հայաստանի Պատմության թանգարանի բակում: ,, Մենք տեսնում ենք, թե ինչ դռնով են ներս ու դուրս արել մեր նախնիները և ինչ գեղարվեստական արժեք են ստեղծել: Տա Աստված, որ այս դուռը հետ գնա իր իսկական տեղը,,- նշեց Գեղարքունիքի մարզպետ Ռաֆիկ Գրիգորյանը: Նախաձեռնության հեղինակի առաջարկով որոշվեց ապրիլի 19-ին Սուրբ Կարապետ եկեղեցում մատուցել Սուրբ պատարագ` ի նշանավորումն Հին Բայազետի բերդի դռան ցուցադրության: Այս մասունքը Սուրբ Կարապետում ցուցադրության կմնա որոշակի ժամանակով, որը տեսնելու հնարավորություն կունենան շատ մարդիկ:
