Գեղարքունիքի մարզպետի աշխատակազմ

Վարդենիսում ավերիչ հողմը խոշոր չափի վնասներ է պատճառել: Հունիսի 29-ի  ժամը 16:30-ի սահմաններում գրանցվել է ավերիչ ուժգնությամբ պտուտահողմ , որը խոշոր չափերի վնասներ է պատճառել քաղաքի հարավ-արևմտյան թաղամասում:

Հողմը արմատախիլ է արել մի քանի տասնյակ պտղատու և դեկորատիվ ծառեր, վթարի է ենթարկել էլեկտրամատակարարման և գազամատակարարման համակարգերը, քշել, պոկել և հեռու է շպրտել 50-ից ավել բնակելի տների կտուրները, փշրել է լուսամուների ապակիներ, մարմնական վնասվածք է պատճառել 2 երեխայի և մեկ չափահաս քաղաքացու:

ՀՀ ԱԻՆ Գեղարքունիքի մարզի փրկարար ծառայության Վարդենիսի հրշեջ-տեղամասի պետ Մնացական Փոստոյանի վկայությամբ՝ պտտահողմը գործել է 1.5 կիլոմետր երկարությամբ և 500 մետր լայնությամբ և եղել է այնպիսի ուժգնության, որ պոկել և 5 մետր հեռավորությամբ ավտոտնակի պատին է խփել «Կամազ» մակնիշի ավտոմեքենան: Այս պահի դրությամբ Գեղարքունիքի մարզպետարանի և Վարդենիսի քաղաքապետարանի հանձնաժողովները երկու աշխատանքային խմբով այցելում են տուժած բնակարաններ և հաշվարկում  վնասների չափերը: